Sigurður Gylfi Magnússon.

Fjallað um sjálfsbókmenntir í sögulegu ljósi

Annað kvöld, þriðjudaginn 22. október kl. 20, flytur Sigurður Gylfi Magnússon prófessor í menningarsögu fyrirlestur í Bókhlöðu Snorrastofu í Reykholti um sjálfsbókmenntir í sögulegu ljósi. Árum saman voru félagssagnfræðingar tregir til að nýta sér við rannsóknir persónulegar minningar fólks nema í mjög afmörkuðum tilgangi. Á síðari árum hefur orðið grundvallarbreyting á hugmyndum fræðimanna um stöðu slíkra minninga í vísindarannsóknum. Í fyrirlestrinum verða reifuð helstu rök og gerð grein fyrir þeim hugmyndum sem Sigurður Gylfi hefur sjálfur um efnið eftir þriggja áratuga reynslu af notkun þeirra. Hann sýnir fram á að minningar fólks geti verið varhugaverðar í vísindarannsóknum en engu að síður óhjákvæmilegt viðfangsefni allra sem kljást við fyrri tíð. Skoðaðar verða ólíkar tegundir sjálfsbókmennta og rætt um kosti og galla þeirra.

Dr. Sigurður Gylfi Magnússon er prófessor við Sagnfræði- og heimspekideild Háskóla Íslands auk þess að vera yfir Miðstöð einsögurannsókna á sama stað (sjá heimasíðu hans: www.sgm.hi.is). Hann er höfundur fjölda bóka greina sem hafa birst á Íslandi og annars staðar í heiminum. Nýjustu bækur hans á ensku eru: Wasteland with Words. A Social History of Iceland, 2010; What is Microhistory? Theory and Practice,  2013, meðhöfundur er dr. István M. Szijártó og Minor Knowledge and Microhistory, 2017, meðhöfundur er dr. Davíð Ólafsson. Sigurður Gylfi er einn þriggja ritstjóra Sýnisbókar íslenskrar alþýðumenningar en í ritröðinni hafa birst 24 bækur á sviði hversdagssögu, einsögu og heimildafræði. Hann er ásamt István M. Szijártó ritstjóri nýrrar ritraðar sem hið alþjóðlega bókaforlag Routledge gefur út og nefnist Microhistories. Hann fer fyrir öndvegisverkefni Rannís sem nefnist „Heimsins hnoss“ og tekur þátt í öðru öndvegisverkefni sem ber heitið „Fötlun fyrir tíma fötlunar“ og dr. Hanna Björg Sigurjónsdóttir leiðir.

Fyrirlesturinn hefst eftir nýrri skipan klukkan 20 og boðið verður til umræðna og kaffiveitinga. Aðgangseyrir er kr. 1000. Snorrastofa hvetur alla til að nýta sér þetta áhugaverða stefnumót við Sigurð Gylfa Magnússon.

-fréttatilkynning

Líkar þetta

Fleiri fréttir