Bókin Stelpur sem ljúga kom út nýverið en það er önnur bók Skagakonunnar Evu Bjargar Ægisdóttur. Eva Björg gaf út sína fyrstu bók vorið 2018, bókina Marrið í stiganum. Fékk hún mikið lof fyrir þá bók sem sat lengi vel í efstu sætum á metsölulistum. Þá hlaut hún einnig glæpasagnaverðlaunin Svartfuglinn, verðlaun sem rithöfundarnir Yrsa Sigurðardóttir og Ragnar Jónsson stofnuðu til í samvinnu við Veröld. Marrið í stiganum gerist á Akranesi, þar sem Eva Björg ólst upp, og heldur hún áfram að nota Vesturland sem sögusvið í nýju bókinni.

Stelpur sem ljúga er um einstæða móður sem hverfur af heimili sínu en skilur eftir skilaboð á eldhússborðinu fyrir 15 ára dóttur sína. Þá er talið víst að hún hafi fyrirfarið sér en lík hennar finnst svo illa farið í Grábrókarhrauni í Norðurárdal sjö mánuðum síðar og stendur lögreglan þá frammi fyrir flókinni morðgátu. Á sama tíma er sögð saga af nýbakaðri móður á fæðingadeild sem hefur óbeit af barninu. „Stelpur sem ljúga er grípandi og mögnuð spennusaga um það hvernig brotin æska og áföll geta leitt til skelfilegra atburða síðar á lífsleiðinni,“ segir í umfjöllun um bókina á vefsíðu Forlagsins.

Þess má geta að í dag klukkan 17-19 mun Eva Björg verða í Eymundsson á Akranesi og kynna og árita bókina á útgáfufagnaði.