Kynnir verkefni um núllsýn í slysum í fjallaferðum
Í kvöld, mánudaginn 14. október kl. 20:00, fer fram áhugaverður fyrirlestur fyrir björgunarsveitarfólk í Gróubúð Grandagarði 1 í Reykjavík. Er fyrirlesturinn í tengslum við ráðstefnuna Slysavarnir 2019. Þar fjallar Stephanie Thomas um verkefni björgunarsveitar hennar í Bandaríkjunum og fleiri aðila þar sem sett var stefnan á núllsýn slysa í fjall- og hálendi svæðisins. Í kynningu segir: „Árið 2015 tóku aðilar á Teton fjallasvæðinu í Wyoming, Bandaríkjunum sig saman og ræstu Backcountry Zero verkefnið en því er ætlað að fræða göngu- og fjallafólk svo koma megi í veg fyrir slys á svæðinu. Hugmyndin er að ná núllsýn í slysum og óhöppum, eitthvað sem er þekkt víða í tengslum við umferð. Í fyrirlestrinum er farið yfir hvernig og hversvegna verkefnið var sett á laggirnar, lykilþætti í að ná árangri, helstu þætti verkefnisins og framtíðarsýn.“
Nánari upplýsingar um verkefnið má finna á www.backcountryzero.com Fyrirlesturinn er á ensku og kostar 2900 krónur inn á hann. Skráning er á vef Landsbjargar.
