Hjónin Ólöf Hjartardóttir og Kristján Ásgeirsson áttu 70 ára brúðkaupsafmæli á mánudaginn. Ljósm. Skessuhorn/arg.

Fögnuðu platinum brúðkaupsafmæli sínu

Hjónin Kristján Ásgeirsson og Ólöf Hjartardóttir fögnuðu síðastliðinn mánudag 70 ára brúðkaupsafmæli. Slíkt kallast platinum brúðkaup og áfangi sem fári hafa náð hér á landi. Kristján og Ólöf eru búsett á Hjúkrunar- og dvalarheimilinu Höfða á Akranesi og þau ætluðu sjálf bara að láta daginn líða án þess að minnast á þennan áfanga við aðra. Dóttir þeirra og dóttursynir á Akranesi höfðu þó ekki gleymt deginum og buðu til lítillar veislu þeim til heiðurs um liðna helgi. Ólöf var á brúðkaupsdaginn, árið 1949, 19 ára gömul og Kristján 23 ára. Þau eiga saman tvö börn, sex barnabörn og barnabarnabörnin eru orðin 15.

Aðspurð segjast þau ekki hafa hugsað sér að gera neitt sérstakt í tilefni brúðkaupsafmælisins en að þau hafi verið dugleg að gera hluti saman áður fyrr. „Heilsan er svosem ágæt miðað við aldur en við erum orðin svo gömul að við erum ekki að fara neitt,“ segir Kristján og brosir. Hann starfaði lengst sem sjómaður en síðustu 17 árin á vinnumarkaðnum vann hann í Sementsverksmiðjunni. „Ég hætti að vinna 67 ára og við höfum bara verið saman síðan þá,“ segir hann og brosir til konu sinnar. „Við höfum verið dugleg að ferðast saman bæði innanland og utanlands en núna gerum við það ekki, ég er orðin 89 ára og Kristján 93 ára,“ segir Ólöf. „En við höfum mikið gert samt saman í gegnum tíðina,“ bætir Kristján þá við.

Líkar þetta

Fleiri fréttir