„Óstaðfestur grunur um e-coli mengun er í vatni frá vatnsbóli í Grábrókarhrauni,“ er fyrirsögn á frétt sem Veitur birta á heimasíðu sinni í dag. Úr vatnsbólinu í Grábrókarhrauni kemur neysluvatn sem þjónar Borgarnesi, Bifröst, Varmalandi og fjölda sumarhúsa og lögbýla á þessari leið. Ekki er vitað með vissu hvort um mengun sé að ræða og segir í frétt Veitna að það muni skýrast fyrir hádegi á morgun, föstudag.

“Sýnið, sem grunurinn beinist að, var tekið við reglubundna sýnatöku að morgni miðvikudagsins 2. október. Dæmi eru um rangar vísbendingar af slíkum sýnum. Niðurstaðna rannsókna Heilbrigðiseftirlits Vesturlands á sýninu er að vænta fyrir hádegi á morgun, 4. október. Þær niðurstöður geta annars vegar eytt öllum grunsemdum um mengun í vatninu eða styrkt gruninn. Í því tilviki munu niðurstöður endurtekinnar sýnatöku liggja fyrir á sunnudag,” segir í tilkynningu sem Veitur voru að senda. „Þótt aðeins sé um grun að ræða mælast Veitur til þess að notendur á þessu svæði sjóði neysluvatn í öryggisskyni þangað til önnur tilmæli berast,“ segir í tilkynningunni.

Mikilvægt er að sjóða allt neysluvatn í að minnsta kosti mínutu til að forðast smit. „Sýnið, sem grunurinn beinist að, var tekið við reglubundna sýnatöku að morgni miðvikudagsins 2. október.“ Þá segir einnig að dæmi séu um að slíkar vísbendingar geti verið rangar. E-coli gerlamengun getur valdið alvarlegum sýkingum hjá fólki og samkvæmt upplýsingum á vef Landlæknis eru einkennin mismikil og getur fólk einnig verið einkennalaust. Helsta einkenni er niðurgangur og þá geta fylgt slæmir kviðverkir og/eða uppköst. Þessi einkenni genga venjulega yfir á 5-7 dögum. „Hluti þeirra sem smitast fær blóðugan niðurgang, stundum í beinu framhaldi af fyrstu einkennum frá meltingarvegi en í sumum tilvikum verður hlé á niðurgangi í einhverja daga og byrjar svo blóðugur niðurgangur,“ segir á vef Landlæknis. Þá leggst sýkingin oft verr á þá sem eru viðkvæmir fyrir, börn og gamalmenni. Það er því áríðandi að fólk fari eftir tilmælum um suðu á neysluvatni þar til frekari niðurstöður liggja fyrir.

Grunur um E-coli smit í Grábrókarveitu