Guðni Th. Jóhannesson, forseti Íslands, sótti Borgarnes heim í morgun. Tilefnið var hinn árlegi forvarnardagur forseta, sem haldinn er á hverju hausti í flestum grunn- og framhaldsskólum landsins. Á deginum er sjónum sérstaklega beint að unglingum í 9. bekk grunnskóla og á fyrsta ári í framhaldsskólum.

Forsetinn fékk góðar móttökur unglingastigs Grunnskólans í Borgarnesi og nemenda Menntaskóla Borgarfjarðar þegar hann mætti í Hjálmaklett. Í ávarpi vék Guðni meðal annars að því að hann teldi hræðsluáróður, boð og bönn, ekki réttu leiðina til að halda ungmennum á beinu brautinni. Forvarnir og samræður væru betur til þess fallnar, ekki síst samtal foreldra og ungmenna. Þá ræddi hann sérstaklega um rafrettur og orkudrykki, en sérstök áhersla er lögð á þetta tvennt á forvarnardeginum í ár, auk þess sem áhersla er lögð á mikilvægi svefns.

Eftir erindi forsetans skiptu nemendur sér upp í fimm manna vinnuhópa. Þeir fengu umræðupunkta um áfengisneyslu ungmenna og forvarnir. Hver hópur skipaði ritara sem nótaði hugmyndir og umræður hjá sér. Eyðublöðin verða síðan send landlækni.

Guðrún Aðalsteinsdóttir, skólameistari MB, sagði ungmennunum síðan stuttlega frá stuttmyndasamkeppni sem haldin er í tengslum við forvarnardaginn. Öllum nemendum, fæddum á árunum 2003-2005, gefst kostur á að taka þátt í stuttmyndakeppni þar sem unnið er með þætti sem geta dregið úr áhættuhegðun. Skilafrestur myndanna er 11. nóvember og verða veitt þrenn verðlaun; fyrir bestu myndina, þá skemmtilegustu og þá frumlegustu.

Að lokum hélt Sölvi Tryggvason fjölmiðlamaður einnig erindi í Hjálmakletti. Hann ræddi um orkudrykki, skjánotkun, mikilvægi góðs og reglulegs nætursvefns og sambandið milli þessara atriða. Nefndi hann dæmi úr eigin lífi hvernig hann hefur sett sjálfum sér skýrar reglur um skjánotkun og hvatti alla til að stilla neyslu koffíns í hóf.

Nemendur Menntaskóla Borgarfjarðar og unglingadeildar Grunnskólans í Borgarnesi hlýða á erindi forsetans.

Forsetinn á forvarnardegi í Borgarnesi