Eftir undirritun samningsins. Bæjarstjóri, landlæknir og aðrir sem viðstaddir voru undirritunina. Ljósm. Akraneskaupstaður.

Akraneskaupstaður innleiðir markmið Heilsueflandi samfélags

Í gær undirrituðu Sævar Freyr Þráinsson bæjarstjóri á Akranesi og Alma D. Möller landlæknir samning um innleiðingu Heilsueflandi samfélags á Akranesi. Með samningnum skuldbindur Akraneskaupstaður sig til að innleiða markmið Heilsueflandi samfélags á Akranesi í samráði við Embætti landlæknis og er jafnframt 29. sveitarfélag landsins sem leggur í þessa vegferð.

„Meginmarkmið Heilsueflandi samfélags er að styðja samfélagið á Akranesi í að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa og þar með að sveitarfélagið verði sjálfbærara, skilvirkara og eftirsóknarverðara til búsetu. Lögð er áhersla á að bæta lífsgæði íbúanna þar sem andleg og líkamleg heilsa er í öndvegi og stuðlar þannig að ánægðari, hamingjusamari og heilsuhraustari íbúum,“ segir í tilkynningu Akraneskaupstaðar vegna samningsins.

Starfshópur um innleiðingu Heilsueflandi samfélags á Akranesi hefur nú þegar tekið til starfa og er verkefnastjóri hópsins Hildur Karen Aðalsteinsdóttir framkvæmdastjóri Íþróttabandalags Akraness. Í starfshópnum sitja auk hennar fulltrúar þeirra hópa í samfélaginu sem hafa mikinn snertiflöt við þjónustu sveitarfélagsins svo sem fulltrúi aldraðra og fulltrúi frístundastarfs.

Líkar þetta

Fleiri fréttir