Vegna mikillar úrkomu er nú appelsínugul viðvörun í gildi fyrir Faxaflóa,Breiðafjörð og Vestfirði. Búist er við áframhaldandi vatnavöxtum í dag í ám og lækjum sem stórlega eykur hættu á flóðum og skriðuföllum. Slíkt hefur nú þegar raskað samgöngum þar sem vegir hafa farið undir vatn og ræsi gefið eftir. Í dag er það einkum sunnanvert Snæfellsnes, Mýrar, Borgarfjörður og Hvalfjörður auk Vestfjarða sem sérstök athygli er vakin á hættu þessu samhliða. Þeim sem eru á akstri er bent á að fara með gát. Áfram er spáð mildu veðri, en líklegt að dragi úrkomu eftir daginn í dag.

Meðfylgjandi myndir voru allar teknar síðdegis í gær og sýna áhrif þessarar miklu úrkomu um vestanvert landið.

Gufuá í Borgarhreppi sem vart rann milli steina í sumar, var sem stórfljót á að líta. Ljósm. mm.

Norðurá milli bæjanna Munaðarness og Hlöðutúns. Ljósm. mm.

Víða var Norðurá farin að fljóta upp á tún, hér eru kindur á „eyju“ neðan við bæinn Brekku. Ljósm. mm.

Ræsi á heimreið að sumarbústað í Norðurárdalnum hafði ekki undan og þá fór að flæða yfir veginn. Ljósm. mm.

Vatnið var komið langleiðina upp í dekkin á gömlu brúnum yfir Ferjukotssýkin. Ljósm. mm.

Berjadalsáin sem vart rann í sumar var býsna vatnsmikil í gærkveldi. Ljósm. mm.

Haffjarðará. Ljósm. Þóra Sif Kópsdóttir.

Hítará var óárennileg. Ljósm. Þóra Sif Kópsdóttir.

Björgunarsveitirnar Heiðar og Brák voru kallaðar út til leitar að fólki á Langavatnsdal. Beilá reyndist ófær og urðu björgunarsveitarmenn frá að að hverfa. Þyrla sótti ferðafólk sem var strandaglópar á svæðinu. Á Langavatnsvegi hafði þessu ræsi skolað undan veginum. Ljósm. Björgunarsveitin Heiðar.

Þyrla Landhelgisgæslunnar sótti í gær þrjá ferðamenn sem urðu innlyksa við Langavatn sökum vatnavaxta. Ljósm. Landhelgisgæslan.

Urriðaá á Mýrum hefur sjaldan orðið svona vatnsmikil. Ljósm. Þóra Sif Kópsdóttir.

Myndasyrpa – Mikil flóð í ám og lækjum á Vesturlandi