Þriðja umferð Íslandsmótsins í rallýi; Rallý Reykjavík, fram fer dagana 29. – 31. ágúst næstkomandi. Að þessu sinni fer stærsti hluti keppninnar fram á Vesturlandi, það er í Borgarfirði sem og á Snæfellsnesi. Einn Borgfirðingurinn; Aðalsteinn Símonarson mætir til leiks ásamt Valdimari Jóni Sveinssyni á MMC Lancer Evo 7, en þetta er fyrsta keppnistímabil þeirra saman. Aðalsteinn er rallýáhugamönnum vel kunnur, en hann hefur verið viðriðinn rallý frá unglingsaldri og skapað sér gott orðspor sem aðstoðarökumaður. Varð hann meðal annars Íslandsmeistari árið 2014 og 2015.

Bifreiðaíþróttaklúbbur Reykjavíkur sér um framkvæmd keppninnar að þessu sinni en um er að ræða umfangsmestu rallýkeppni ársins, þar sem eknir verða rúmlega þúsund kílómetrar, þar af tæplega 300 km. á sérleiðum.

Keppnin hefst stundvíslega í dag, fimmtudaginn 29. ágúst, klukkan 17:00 við Olís í Mjódd en fyrsta sérleið dagsins verður ekin um Djúpavatn. Eftir næturhlé í Reykjavík verður dagurinn tekinn snemma í fyrramálið og haldið vestur á Snæfellsnes þar sem fyrsti bíll verður ræstur frá Arnarstapa klukkan 10:00. Verða eknar fjórar umferðir milli Arnarstapa, Ólafsvíkur og Prestahrauns áður en hádegishlé verður tekið hjá söluskála ÓK í Ólafsvík. Eftir hádegishlé verður haldið í Berserkjahraun en að því loknu verður ekið yfir á Mýrarnar þar sem eknar verða fjórar ferðir um Skíðsholt og Hítardal. Samansöfnun og viðgerðarhlé verður síðan um klukkan 21:30 við Olís í Borgarnesi.

Þriðja og síðasta daginn, laugardaginn 31. ágúst, hefst keppni aftur snemma og munu keppendur að mestu halda sig í Borgarfirðinum, nánar tiltekið á gamla veginum um Tröllháls, Uxahryggi og Kaldadal. Verður fyrst bíll ræstur inn á Tröllháls klukkan 08:10 og munu keppendur aka hverja leið tvisvar sinnum. Að þeim loknum verður haldið að Djúpavatni en keppninni lýkur klukkan 15:15 við Olís í Mjódd.

„Af öryggisástæðum er fólk beðið að virða lokanir á leiðum meðan á keppni stendur en einnig er fólk hvatt til að koma og hitta keppendur, skoða bílana og upplifa stemminguna. Nánari upplýsingar um keppnina er að finna á heimasíðu Bifreiðaíþróttaklúbbs Reykjavíkur, bikr.is,“ segir í tilkynningu.

Rallýkeppni hefst í dag víðsvegar um Vesturland