Heimsókn Zöru í Akranesvita með augum Bjarna Þórs skopmyndateiknara Skessuhorns.

Zara ferðaðist um Vesturland og tók lagið í Akranesvita

Sænska poppstjarnan Zara Larsson skellti sér í ferðalag um Ísland eftir að hún hitaði upp fyrir Ed Sheeran á Laugardalsvelli um þarsíðustu helgi. Gerði hún sér m.a. ferð á Akranes og um Snæfellsnes. Á Akranesi heimsótti hún Akranesvita ásamt móður sinni og fararstjóra, tók lagið og birti myndband af sér að syngja á Instagramsíðu sinni þar sem hún mærði hljómburð vitans. Hilmar Sigvaldason vitavörður tók á móti hópnum, en hann viðurkennir að hafa ekki þekkt poppstjörnuna þegar hana bar að garði. „Allan þennan tíma sem þau þrjú voru í heimsókninni hafði ég ekki grun um hver þessi stelpa væri,“ segir Hilmar Sigvaldason vitavörður léttur í bragði. „Ég er þess fullviss að þessi heimsókn eigi eftir að hafa góð áhrif á Akranesvitann og Akranes almennt,“ segir Hilmar, en þegar þessi orð eru rituð hefur verið horft 780 þúsund sinnum á myndbandið.

Líkar þetta

Fleiri fréttir