Lögreglan á Vesturlandi tók nýja lögreglubifreið í notkun í síðustu viku. Um er að ræða Landrover Discovery, fullbúinn lögreglubíl sem er auk þess sérútbúinn fyrir umferðareftirlit. „Á þessum bíl verður fyrst og fremst haft eftirlit með atvinnutækjum sem eru á ferðinni, en lögregla hefur eftirlit með farmi flutningabíla, fylgist með því að hvíldartímaákvæðum sé fylgt og fleira slíkt, auk þess að hemlaprófa og vigta atvinnutæki,“ segir Ásmundur Kr. Ásmundsson aðstoðaryfirlögregluþjónn í samtali við Skessuhorn.

„Hann var sérvalinn í þetta verkefni af því hann hefur dráttargetu upp á 3,5 tonn og getur því dregið þungan hemlaprófunarvagn. Auk þess eru í honum vogir til að vigta atvinnutæki,“ bætir hann við. „Nýja bílinn höfum við á leigu og er rekstur hans töluvert hagkvæmari en verið hefur, en hann leysir af gamla Ford Transit sendiferðabifreið sem notuð var til að sinna sömu verkefnum. Sá bíll var kominn til ára sinna,“ segir Ásmundur.

Þrír nýir bílar á árinu

Ásmundur segir að töluverðar breytingar til batnaðar séu framundan í bílamálum Lögreglunnar á Vesturlandi á næstu misserum. Auk nýja umferðareftirlitsbílsins hefur Lögreglan á Vesturlandi tekið þrjá aðra nýja bíla í notkun frá áramótum. Einn þeirra er á Akranesi, annar í Borgarnesi og sá þriðji á Snæfellsnesi.

„Við vorum í raun að bregðast við slæmu ástandi og þurftum að endurnýja þrjá bíla strax, þar af einn sem var ekinn 500 þúsund kílómetra. Einn bíllinn sem við notum í dag er frá árinu 2008, eða ellefu ára gamall og annar er sjö ára. Lögreglubíla þarf helst að endurnýja á hámark fimm ára fresti,“ segir hann, en allt í allt hefur embættið 15 bíla til umráða, bæði merktar og ómerktar lögreglubifreiðar.

„Þrír lögreglubílar hafa verið endurnýjaðir frá áramótum, auk nýja umferðareftirlitsbílsins, en á síðustu þremur árum þar á undan höfðum við aðeins fengið einn nýjan bíl og ástand flotans ekki gott. Þessir bílar leystu af hólmi mjög gamla bíla, þannig að um nauðsynlega endurnýjun er að ræða. Ætlun okkar er að fylgja þessu eftir og halda áfram að endurnýja bílaflotann,“ segir Ásmundur.

Nýr lögreglubíll tekinn í notkun