Listahátíðin Plan-B Art Festival var haldin í þriðja sinn um síðustu helgi í Borgarnesi og gekk hátíðin vonum framar í ár að sögn skipuleggjenda. Sýnt var á alls ellefu stöðum víðsvegar um bæjarplássið og nágrenni og voru listamenn á um þriðja tug sem tók þátt í hátíðinni.

Plan-B hófst með opnun samsýningar í aðalsýningarrými hátíðarinnar sem í ár var jarðhæð Arion banka hússins við Digranesgötu 2. Í kjölfar opnunarinnar var innsetning í Borgarneskirkju þar sem Anna Kolfinna Kuran sýndi verk sitt „Yfirtaka“ og naut þar liðsinnis meðal annarra kvenna úr Borgarnesi á öllum aldri. Að auki voru smærri viðburðir og opnanir víðsvegar um bæinn. Snæfríður Rós Gunnarsdóttir sviðshöfundur sýndi innsetningu í Íþróttamiðstöð Borgarness sem vakti hrifningu og umtal gesta og gangandi og listahópurinn IYFAC setti svip sinn á bæinn með litríkum flöggum sem voru hluti af gjörningi sem fór fram á laugardeginum. Hápunktur hátíðarinnar var svo á laugardagskvöldinu í gamla fjósinu í Einarsnesi, sem hlotið hefur nafnið Space of Milk, þegar gjörningakvöld Plan-B fór fram. Gjörningakvöldið er orðinn fastur liður á hátíðinni og þar komu fram alls þrjú atriði eftir listatríóið Útvarp Krísuvík, Hildi Elísu Jónsdóttur, sem einnig sýndi á Sögulofti Landnámssetursins, og Þröstur Valgarðsson. Þröstur var jafnframt með sýningu í húsnæði Arion banka, en Þröstur ólst upp í Borgarnesi og var nú að sýna list sína á heimaslóðum.

Útilistaverk hafa vakið athygli

Útilistaverk hátíðarinnar vöktu einnig athygli. Veglegt verk eftir Krot & Krass má nú sjá á húsnæði Borgarverks í Brákarey, en skipuleggjendur hafa fengið símtöl frá ánægðum íbúum með verkið. Auk þess hefur verk Tobia Zambotti vakið athygli í fjörunni við Menntaskóla Borgarfjarðar. Metaðsókn var á alla viðburði að sögn skipulagsnefndar hátíðarinnar sem sér mikla fjölgun í aðsókn gesta en mikill fjöldi fólks utan Borgarness mætti og segja skipuleggjendur tækifæri fólgin í nálægð við höfuðborgarsvæðið vegna hátíðar sem þessarar.

Fagleiki áberandi á hátíðinni

„Við skipuleggjendur hátíðarinnar erum í sjöunda himni með hvernig gekk. Verkin voru af miklum gæðum og fagleiki þátttakenda var áberandi. Frágangi er næstum lokið en þó er starfi nefndarinnar ekki lokið. Við tekur vinna við uppgjör, greiðslu reikninga og gerð lokaskýrslna. Vinna við þessa hátíð hófst í janúar á þessu ári og ég áætla að henni ljúki í september, október, þannig hún er í huga okkar meirihlutann af árinu! Fátt kom okkur á óvart, enda hefur mótast gott handrit að hátíðinni frá fyrri árum,“ sagði Sigursteinn Sigurðarson, arkitekt og einn af skipuleggjendum hátíðarinnar, nú eftir helgina.

Listahátíðin Plan-B Festival gekk vonum framar