Lestrarbókin Gagn og gaman, 2. hefti, hefur verið endurútgefin, en bókin hefur verið ófáanleg um áratuga skeið. Það er Bókaútgáfan Sæmundur sem gefur út en áður hafði Sæmundur gefið 1. hefti Gagns og gamans út. „Hlaut sú útgáfa afburða viðtökur lesenda,“ segir í tilkynningu frá útgáfunni.

„Gagn og gaman kom fyrst út haustið 1933 og þá í einu hefti. Bókin var samvinnuverkefni Ísaks Jónssonar og Helga Elíassonar sem fengu Tryggva Magnússon listmálara til að gera teikningar. Bókin var þá enn í mótun og við endurskoðun hennar árið 1941 var henni skipt í tvö hefti. Með nýrri og breyttri útgáfu árið 1955 var fyrra heftið prentað í lit. Var það fyrsta skyldunámsbók landsmanna sem var litprentuð. Þórdís dóttir Tryggva teiknaði nýjar myndir við þá kafla sem bætt var við. Seinna heftið var litprentað 1959. Var verkið þá komið í endanlega gerð,“ segir í tilkynningunni.

„Gagn og gaman var áhrifarík kennslubók. Hún var nær einráð við lestrarkennslu yngstu barna í hálfa öld. Bókin byggðist á hljóðaðferð við lestrarkennslu sem þar með var innleidd í íslenskum skólum. Talið er að um 200 þúsund eintök hafi verið prentuð af fyrra hefti bókarinnar og 120 þúsund eintök af því síðara. Bækurnar voru ófáanlegar um rúmlega 30 ára skeið, en fyrra heftið kom aftur út haustið 2017. Gagn og gaman, 2. hefti, er framhaldslesbók þar sem áhersla er lögð á að æfa stafasambönd, samanber ábendingar neðanmáls. Nokkur þyngdarmunur er á heftunum og því voru börnin oft látin æfa sig á léttu lesefni áður en byrjað var á síðara heftinu.

Gagn og gaman, 2. heftið, er hér gefið út til að vekja athygli á merkri lestrarkennslubók. Margt hefur breyst frá því bókin var almennt notuð og er hún því einnig skemmtilegur aldarspegill og góð heimild um veröld sem var.“

Annað hefti Gagns og gamans í verslanir