Í vikunni fyrir verslunarmannahelgi var rykið dustað af horfnum atvinnuháttum á Breiðinni á Akranesi. Starfsmenn garðyrkjudeildar Akraneskaupstaðar unnu þá að því að endurgera hluta stakkstæðanna, sem áður fyrr voru notuð til að breiða út saltfisk til þurrkunar.

Verkið er hluti af heildarhönnun arkitektarstofunnar Landslags fyrir Breiðarsvæðið. Steinalögnin er unnin undir handleiðslu Unnsteins Elíassonar, torf- og grjóthleðslumanns á Ferjubakka í Borgarfirði.

Verkefnið nýtur styrks úr Framkvæmdasjóði ferðamannastaða. Akraneskaupstaður fékk í vor úthlutað 35 milljónum króna til Breiðarsvæðisins á Akranesi. Styrkurinn er veittur til að leggja nýtt yfirborðsefni á svæðinu; grasstein, steinalögn, stakkstæði og torf, sem og að jarðvegsskipta hluta svæðisins og hækka til samræmis við umhverfið.

: Frá framkvæmdum garðyrkjudeilarinnar á Breiðinni. Ljósm. Akraneskaupstaður.

Stakkstæðin á Breiðinni endurgerð