Erindi Brekkubæjarskóla á Akranesi um aukna þjónustuþörf var tekið fyrir öðru sinni á fundi bæjarráðs síðasta fimmtudag. Bæjarráð hafði áður afgreitt erindið með ófullnægjandi hætti og var það því lagt fyrir að nýju, að því er fram kemur í fundargerð.

Niðurstaðan var sú að bæjarráð, í umboði bæjarstjórnar, samþykkti viðauka við fjárhagsáætlun upp á 4,2 milljónir króna, vegna aukinnar þjónustuþarfar í skólans fyrir komandi skólaár. Útgjöldum verður mætt með lækkun á handbæru fé.

Rakel Óskarsdóttir er bæjarfulltrúi Sjálfstæðisflokks og á jafnframt sæti í bæjarráði. Hún sat hjá við afgreiðsluna og gagnrýndi vinnubrögð meirihlutans. Í bókun Rakelar er rifjað upp að bæjarstjórn hafi samþykkt reglur um gerð viðauka á fundi sínum í lok maí síðastliðins, með það að markmiði að skýra ferli við gerð slíkra viðauka og áhrif þess á fjárhagsáætlanir og ársreikninga. „Samkvæmt sveitarstjórnarlögum og reglugerð um bókhald, fjárhagsáætlun og ársreikninga sveitarfélaga er fjárhagsáætlun bindandi fyrir yfirstandandi ár og óheimilt að víkja frá áætlun nema bæjarstjórn hafi samþykkt viðauka við fjárhagsáætlun,“ segir í bókun Rakelar. „Á fundi bæjarráðs Akraness þann 11. júlí sl. samþykkti bæjarráð Akraness með atkvæði eins fulltrúa Samfylkingarinnar auka fjárútlát að upphæð 10.025.180,- kr., vegna aukinna stöðugilda í Brekkubæjarskóla, án samþykktar eða gerð viðauka við fjárhagsáætlun bæjarins. Framsókn með frjálsum kölluðu þá ekki inn varamann vegna vanhæfi formanns bæjarráðs,“ segir í bókuninni. Rakel gagnrýnir að ekki hafi verið gerður viðauki vegna ráðstöfunarinnar. „Í öðru lagi er kveðið á um í reglugerð um viðauka að ávallt skuli leitast við að finna svigrúm innan viðkomandi deildar/málaflokks sem ráðstöfunin varðar áður en leitað skuli að svigrúmi annars staðar. Í þessu tilfelli var það ekki gert, né ákvörðun tekin um hvaðan fjármunirnir fyrir ráðstöfuninni áttu að koma.“ Enn fremur segir í bókuninni að beiðnin hafi komið inn til bæjarráðs frá skóla- og frístundaráði án afstöðu fagráðsins til málsins. „Í fjórða lagi gerir fulltrúi Sjálfstæðisflokksins athugasemdir við það að einn fulltrúi bæjarráðs (í umboð bæjarstjórnar) geti tekið ákvörðun um ráðstöfun slíkra fjármuna.“

Gerir athugasemdir við vinnubrögð meirihluta