Hin árlega Reykholtshátíð verður haldin 23. sinni um helgina, dagana 26. til 28. júlí. Dagskrá hátíðarinnar nær yfir vítt svið og að vanda kemur fram fjöldi einstakra listamanna. Má þar nefna nokkra einsöngvara af yngri kynslóðinni sem þó hafa unnið sér sess sem listamenn, svo sem Odd Arnþór Jónsson sem opnar hátíðina kl. 20:00 á föstudagskvöld, ásamt Önnu Guðnýju Guðmundsdóttur. „Allir sem fram koma á hátíðinni eru einstakir listamenn á sínu sviði,“ sagði Valgerður G. Halldórsdóttir, kynningarstjóri Reykholtshátíðar, í samtali við Skessuhorn í þarsíðustu viku.

Kvenakórinn Vox Feminae kemur fram á laugardeginum undir stjórn Hrafnhildar Árnadóttur Hafstað. Kórinn er af mörgum talinn meðal bestu kvennakóra landsins og mun flytja bæði frumsamin lög og útsett þjóðlög. Að kvöldi laugardags verða kammertónleikar undir yfirskriftinni Rétttrúnaður og rómantík. Sérstakur gestur þeirra tónleika verður hollenski lágfiðluleikarinn Anna Magdalena den Herder, sem mun koma fram í fyrsta sinn á Reykholtshátíð.

Hátíðinni lýkur síðan á sunnudag með tónleikunum Heimskringla og hetjudáð. Þar koma allir hljóðfæraleikarar hátíðarinnar saman ásamt Oddi Arnþóri og Hrafnhildi og þá bætist Guja Sandholt mezzósópran í hópinn. Fluttur verður Píanókvartett í F-moll eftir Brahms og lagaflokkur Tryggva M. Baldvinssonar við texta Þórarins Eldjárns. Einnig verður flutt líklega stysta ópera í heimi, King Harald‘s Saga, sem unnin er upp úr Heimskringlu og er aðeins um tíu mínútur að lengd.

Snorrastofa í Reykholti tekur þátt í hátíðarhöldunum með því að bjóða upp á fyrirlestur að laugardeginum. Þar mun Bjarni Guðmundsson á Hvanneyri segja frá búskap Gísla Súrssonar og hans fólks.

Hægt er að kaupa helgarpassa á hátíðina en einnig aðgang að stökum tónleikum, sem og þriggja tónleika passa. Nánari upplýsingar um hverja tónleika og hátíðina í heild má sjá á www.reykholtshatíd.is.

Reykholtshátíð hefst á morgun