Fjórða umferð Íslandsmótsins í torfæru, Bílanaustartorfæran, var ekin í blíðskaparveðri í gryfjunum við Fellsenda í Akrafjalli síðastliðinn laugardag. Þór Þormar Pálsson á THOR bar sigur úr býtum í flokki sérútbúinna bíla með 1315 stig. Skúli Kristjánsson á Simba varð annar með 1282 stig og Aron Ingi Svansson á Stormi þriðji með 1260 stig. Þór Þormar leiðir baráttuna um Íslandsmeistaratitilinn þegar ein umferð er eftir. Hann hefur 62 stig samtals, en Haukur Viðar Einarsson á Heklu er ekki langt undan með 58 stig í öðru sæti. Þriðji er Geir Evert Grímsson á Sleggjunni með 42 stig.

Í flokki götubíla voru Óskar Jónsson á Úlfinum og Óskar V. Björnsson á Pjakknum jafnir í 1. sætinu með 1420 stig hvor. Steingrímur Bjarnason á Strumpnum hafnaði í þriðja sæti með 1370 stig. Steingrímur og Óskar há harða baráttu um Íslandsmeistaratitilinn í götubílaflokki. Steingrímur leiðir með tveimur stigum fyrir lokaumferðina með 72 stig gegn 70 stigum Óskars.

Metfjöldi áhorfenda

Það var Torfæruklúbbur Suðurlands sem annaðist keppnishaldið. Helga Katrín Stefánsdóttir, formaður klúbbsins, segir allt hafa gengið eins og best verður á kosið. „Keppnin gekk ljómandi vel í blíðskaparveðri. Brautirnar voru mjög góðar og áhorfendur fengu að sjá mikil tilþrif, eins og sést hafa á myndum og myndböndum frá keppninni,“ segir Helga í samtali við Skessuhorn og bætir ánægð við að metfjöldi áhorfenda hafi fylgst með keppninni. „Aldrei hafa fleiri áhorfendur mætt síðan Torfæruklúbbur Suðurlands byrjaði að halda keppnina á þessu svæði fyrir fjórum árum síðan,“ segir hún. „Allt saman var þetta eins og best verður á kosið og við skipuleggjendur og keppnisstjórn erum í skýjunum með hvað þetta gekk vel allt saman,“ segir Helga Katrín að endingu.

Tilþrifamikil torfæra í Akrafjalli