Katrín Jakobsdóttir forsætisráðherra hefur skipað dr. Ásgeir Jónsson í embætti seðlabankastjóra. Skipunin gildir til fimm ára frá 20. ágúst næstkomandi.

Embættið var augýst laust til umsóknar í febrúar síðastliðnum. Alls bárust 16 umsóknir, en þrír drógu umsóknir sínar til baka. Alls voru því 13 umsóknir, frá ellefu körlum og tveimur konum.

Hæfisnefnd mat fjóra umsækjendur mjög vel hæfa til að gegna starfinu; Arnór Sighvatsson, Ásgeir Jónsson, Gylfa Magnússon og Jón Daníelsson. Forsætisráðherra boðaði alla þessa umsækjendur til viðalta, sem og fimm umsækjendur sem höfðu verið metnir vel hæfir. Auk faglegrar þekkingar lagði ráðherra mat á persónubundna þætti umsækjenda, svo sem stjórnunarhæfileika og hæfni í samskiptum. Að viðtölum forsætisráðherra loknum var það mat hans að Ásgeir Jónsson væri hæfastur umsækjenda.

Ásgeir Jónsson er doktor í hagfræði frá Indiana háskóla í Bandaríkjunum. Hann lauk doktorsprófi árið 2001 með alþjóðafjármál, peningamálahagfræði og hagsögu sem aðalsvið. Doktorsritgerð hans fjallaði um sveiflujöfnun yfir skamman tíma í litlu, opnu hagkerfi.

Ásgeir hefur starfað við hagfræðideild Háskóla Íslands frá árinu 2004, fyrst sem lektor og síðan dósent. Hann hefur verið deildarforseti hagfræðideildar frá 2105. Samhliða störfum sínum við Háskóla Íslands hefur Ásgeir verið meðal efnahagsráðgjafa Virðingar og Gamma. Hann hefur gegnt öðrum ábyrðgarstörfum, m.a. verið formaður starfshóps um endurskoðun peningastefnu og forstöðumaður í greiningardeild og aðalhagfræðingur Kaupþings og síðar Arion banka fr´2004 til 2011. Þar áður, frá 2000 til 2004, var hann sérfræðingur hjá Hagfræðistofnun og stundakennari við Háskóla Íslands.

Ásgeir Jónsson er nýr seðlabankastjóri