Björn Bjarki Þorsteinsson, fyrrverandi oddviti Sjálfstæðisflokksins í Borgarbyggð og núverandi framkvæmdastjóri Brákarhlíðar í Borgarnesi, varpaði fyrr í vikunni fram á facebook síðu sinni þeirri hugmynd, að hvetja Harald Benediktsson bónda á Vestra-Reini og fyrsta þingmann Norðvesturkjördæmis til að gefa kost á sér til formennsku í Sjálfstæðisflokknum. Björn Bjarki segir umræðu að undanförnu í röðum Sjálfstæðismanna gefa tilefni til að leitað verði að mannasætti til forystu og þá gjarnan út fyrir raðir nýverandi forystu. „Það er fullt tilefni til að velta við steinum, ræða málin, og allt í fullri virðingu fyrir núverandi forystufólki Sjálfstæðisflokksins, sem allt er sómafólk,“ segir Björn Bjarki en bætir við: „Haraldur Benediktsson hefur sýnt með framgöngu sinni á Alþingi, í forystu fjárlaganefndar og í öðrum verkum að hann er skynsamur, lausnamiðaður og maður sátta þó þannig að það næst ætíð lending og verkin komast í framkvæmd – og það eru stórir kostir. Með hverjum deginum sem líður styttist í næsta landsfund Sjálfstæðisflokksins, er ekki fullt tilefni Haraldur til að hugsa málið,“ spyr Björn Bjarki.

Skessuhorn bar þessar vangaveltur undir Harald sjálfan sem neitar staðfastlega að nokkuð í þessa veru væri í farvatninu og hreint ekki í umræðunni. „Við Sjálfstæðismenn höfum prýðilegan formann og varaformann og þetta ágæta fólk er ekki á förum úr forystu flokksins. Ég lít því á þessa áskorun frá Bjarka sem svona léttan sumarleik, flestir aðrir eru hins vegar alveg uppteknir í Face-appinu,“ sagði Haraldur og hló.

Formaðurinn neitar staðfastlega

Því má við þetta bæta að Morgunblaðið bar undir Bjarna Benediktsson formann Sjálfstæðisflokksins þá spurningu, hvort hann hygðist segja af sér formennsku, en sögusagnir hermdu að svo væri. „Það er enginn fótur fyrir þessum endurteknu sögusögnum. Þessar sögusagnir, eða slúður, má að mínu mati rekja til andstæðinga Sjálfstæðisflokksins, sem óska þess helst að ég hætti. Ég lít einfaldlega á slíkar óskir sem hrós, en þeim mun ekki verða að ósk sinni, því það er ekki að fara að gerast að ég hætti sem formaður flokksins,“ sagði Bjarni Benediktsson, fjármálaráðherra og formaður Sjálfstæðisflokksins í Morgunblaðinu í dag.

Lítur á þetta sem sumarleik og bendir á að aðrir séu á Face-appinu