Til stendur að hefja víðtæka rannsókn hér á landi sem hefur það markmið að leiða í ljós hvaða sess torfhús skipa í hversdagslífi þjóðarinnar, fræðslu og ferðaþjónustu og hvort Íslendingar vilji vernda og nýta þannig hús með öðrum hætti en nú er gert. Fyrsti áfangi þessa verkefnis er útsending á spurningaskrá. Að rannsókninni standa Þjóðminjasafn Íslands, Minjastofnun Íslands, Byggðasafn Skagfirðinga og Rannsóknamiðstöð ferðamála undir forystu Ferðamáladeildar Háskólans á Hólum, sem leiðir verkefnið. Með hugtakinu „torfhús“ er átt við hús sem að meira eða minna leyti eru hlaðin úr torfi og grjóti.

Samhliða rannsókninni eru áform um að skrá torfhús og torfhúsaleifar á landinu því fjöldi standandi eða nýtanlegra torfhúsa er óþekktur. Þá verða torfhús þar sem yngri byggingarefni eru áberandi einnig skrásett (t.d. steinsteypa og bárujárn).

„Torfhús eru mikilvægur hluti af íslenskum menningararfi. Þau varpa ljósi á sérstöðu íslensks byggingararfs. Erlendir ferðamenn sýna þeim áhuga og ferðamennska og -þjónusta, sem hefur vaxandi áhrif á efnahag, menningu, náttúru og ímynd landsins, hefur einnig haft áhrif á sjónarmið fólks til verndunar og nýtingar menningar- og náttúruminja. Ókunnur fjöldi standandi og hálfstandandi torfhúsa er um allt land en viðhaldsþekking þeirra er hverfandi. Við því þarf að bregðast svo hægt verði að gera ráðstafanir, hvort sem er til verndunar og nytja eða utanumhalds til framtíðar litið. Markmið með rannsókn um viðhorf landsmanna og ferðamanna til þessa menningararfs er að leiða í ljós hvaða sess torfhús hafa í fræðslu, minjavernd og í ferðaþjónustu og hver vilji Íslendinga er til að vernda og nýta torfhús, hvort sem þau eru notuð eða ekki,“ segir í kynningu um verkefnið.

Sjá tengil á spurningaskrá: http://www.sarpur.is/Spurningaskra.aspx?ID=1944954

Rannsókn hafin á viðhorfi almennings til torfhúsa