Skipulagsstofnun gaf 11. júní síðastliðinn út þann úrskurð að breikkun Vesturlandsvegar um Kjalarnes skuli sæta mati á umhverfisáhrifum. Það mun þýða verulega seinkun þess að hefja megi framkvæmdir. Samkvæmt lögum um umhverfisáhrif má kæra ákvörðunina til úrskurðarnefndar umhverfis- og auðlindamála og rennur sá frestur út mánudaginn 15. júlí næstkomandi.

Gert er ráð fyrir að gera svokallaðan 2+1 veg á níu kílómetra kafla á Kjalarnesi, auk hliðarvega, hringtorga og göngu-, hjóla- og reiðstíga. Framkvæmdin er tilkynnt Skipulagsstofnun af Vegagerðinni til ákvörðunar um matsskyldusamkvæmt. „Við mat á því hvort tilkynningarskyld framkvæmd skuli háð umhverfismati skal taka mið af eðli framkvæmdar, svo sem stærð og umfangi framkvæmdar, nýtingu náttúruauðlinda, mengun og ónæði, sbr. 1. tl. 2. viðauka laga nr. 106/2000,“ segir í niðurstöðu Skipulagsstofnunar sem telur, með vísan til ákvæða tilskipunar ESB um mat á umhverfisáhrifum, að líta verði svo á að breikkun Vesturlandsvegar sé matsskyld framkvæmd.

„Með framkvæmdunum verður vegurinn breikkaður umtalsvert og með tengdum framkvæmdum verður rask talsvert meira þar sem einnig er áætlað að gera endurbætur á núverandi hliðarvegum auk lagningar nýrra hliðarvega allt að 11 km og rask vegna þeirra verður að minnsta kosti 10 ha. Er þá ótalið rask vegna annarra tengdra framkvæmda eins og reiðvega og göngu- og hjólastíga. Áhrif allra þessara framkvæmda gerir það að verkum að umfang fyrirhugaðra framkvæmda er töluvert meira en fyrir liggur í greinargerð. Þetta mikla umfang veglagningar kallar á nánari skoðun og greiningu, m.a. er ekki gerð grein fyrir umhverfisáhrifum hliðarveganna sem kunna samkvæmt framlögðum gögnum að verða umfangsmikil.“

Hægt er að kynna sér nánar úrskurð Skipulagsstofnunar inn á vef stofnunarinnar.

Frestur rennur út eftir helgi til að kæra niðurstöðu um umhverfismat