Írskir dagar voru settir rétt í þessu fyrir utan bæjarskrifstofurnar við Stillholt á Akranesi í hellidembu. Leikskólabörn í bænum voru komin saman til að hlusta á bæjarstjórann setja hátíðina og var ekki að sjá að rigningin hefði nokkur áhrif á börnin. Skemmtikraftarnir Sverrir Þór Sverrisson og Vilhelm Anton Jónsson, betur þekktir sem dúóið Sveppi og Villi, voru mættir á svæðið með gítarinn og skemmtu krökkunum og gestum sem voru mættir á setningarathöfnina.

Hefðbundin dagskrá hefst nú, með hléum, og verður fjölbreytt afþreying í boði fyrir alla fjölskylduna alveg fram á sunnudag.

Írskir dagar settir