Það var óvenjulega stillt og fallegt veður á miðunum norðan við Snæfellsnes í gær. Alfons Finnsson fréttaritari Skessuhorns var á strandveiðum og fagnaði því að fá einn svona blíðviðrisdag til tilbreytingar. „Ég var á Flákanum, um 24 sjómílur norður af Ólafsvík. Aflinn var blandaður, en þó betri en hann er nær landi. Menn hafa því verið að sigla þetta upp í 45 sjómílur til að komast í betri fisk,“ sagði Alfons.

Veiðimenn hafa einnig verið að taka eftir makríltorfum á miðunum undanfarna daga, einkum suður af Svörtuloftum. „Vestan við Flákann hafa menn einnig verið að fá makríl á krókana þannig að hann er mættur á svæðið,“ sagði Alfons sem er í landi í dag, enda bræla eftir að lægð gekk yfir í nótt.

Þessa mynd tók Guðmundur St. Valdimarsson af makrílvöðu suður af Svörtuloftum.

Sá guli. Ljósm. af.

Blíða í gær en bræla í dag