Sögufélag Borgarfjarðar gefur nú út 20. árgang Borgfirðingabókar. Starfsemi Sögufélagsins á sér þó mun lengri sögu. Það var stofnað 7. desember 1963 og er því komið vel á sextugsaldurinn. Fyrstu útgáfuverk félagsins voru íbúatöl og Borgfirzkar æviskrár. Hlutverkin voru þó fleiri eins og segir í 2. grein samþykkta þess þar er einnig tekið fram að vinna skuli að söfnun og útgáfu „einstakra þátta úr borgfirzkri menningar- og atvinnusögu, borgfirzkrar ættfræði og örnefna, og annars þess, er varðar sögu Borgfirðinga og Borgarfjarðarhéraðs.“

Það má segja að Borgfirðingabók spanni þessa þætti sem upp eru taldir. Fyrstu bindi hennar voru heldur smærri í sniðum en þau síðari. Ritnefnd hefur að leiðarljósi að efnið sé fjölbreytt og horft er til margra þátta við efnisval hverrar bókar. Meðal annars er horft til aldurs höfunda, hvaðan af svæðinu þeir eru, huga þarf að kynjahlutfalli og hvort um er að ræða frásagnir, vísindalega umfjöllun, ljóð eða smásögu og í hverri bók er kynning á einum listamanni. Í þessari bók varð málaralistin fyrir valinu en áður hefur meðal annars verið kynnt fólk sem fæst við ljósmyndun, vefnað , útskurð og prjón. Við búum svo vel að fólk hefur verið boðið og búið að útvega eða semja efni þegar eftir því hefur verið leitað, einnig er töluvert um að ritnefnd fái ábendingar um efni og viljum við hvetja fólk til að halda því áfram. Í þessari bók hafa tæplega 40 höfundar lagt til efni í 30 greinar eða þætti. Aldursmunur á milli yngsta og elsta höfundar er um 85 ár, enda er umfjöllunarefni frá deginum í dag og aftur á 19. öld. Í bókinni er fjöldi mynda, en þær segja oft meira en mörg orð.

Nánari upplýsingar er hægt að nálgast í síma 894-8108 eða á fésbókarsíðunni Sögufélag Borgarfjarðar – Borgfirskar æviskrár.

-id

Borgfirðingabók 2019 komin í hendur áskrifenda