Sólin dansar yfir sjóndeildarhringnum fyrir dolfallna áhorfendur í sumarsólstöðuferð á Snæfellsjökul. Ljósm. tfk.

Vesturland er vetraráfangastaður Evrópu annað árið í röð

Ferðatímaritið Luxury Travel Guide hefur tilkynnt að Vesturland hafi annað árið í röð verið valið vetraráfangastaður Evrópu, eða; ,,Winter Destination of Europe 2019.“ Landshlutinn er hlaðinn verðlaunum en nefna má að árið 2017 hlaut það titilinn myndrænasti áfangastaður Evrópu. Þetta er því þriðja árið í röð sem Vesturland hlýtur verðlaun hjá tímaritinu. Luxury Travel Guide sérhæfir sig í skrifum um áfangastaði, hótel, heilsulindir, tækni og fleira en blaðið leggur áherslu á betur borgandi ferðamenn. Vesturland var valið vegna mikillar náttúrufegurðar og er það talið sérstaklega sjarmerandi yfir vetrarmánuðina.

Á heimasíðu Markaðsstofu Vesturlands segir svo um umsögn LTG um valið á Vesturlandi: „Landshlutinn státar af sláandi fallegu landslagi og lokkar ferðamenn til sín með loforðum um sögu, eldfjöll, fallega fossa og jökla. Vesturland er heimili Snæfellsjökuls, hins glæsilega jökuls sem trónir á toppi gamals eldfjalls og drottnar yfir nærumhverfinu. Nokkur fyrirtæki bjóða uppá ferðir á jökulinn en á heiðskírum dögum er útsýnið þaðan stórfenglegt. Vesturland er einnig heimili Langjökuls, næst stærsta jökuls í Evrópu, þar sem hin einstöku ísgöng má finna. Nokkur fyrirtæki bjóða uppá ógleymanlegar ferðir uppá Langjökul og í ísgöngin. Ef leitað er eftir góðri heilsulind, þá opnaði Krauma nýlega, dásamleg náttúruböð við hliðina á Deildartunguhver þar sem fullkomið er að slaka á og njóta náttúrunnar í vatninu frá vatnsmesta hver í Evrópu.“ Þá segir að landshlutinn sé fallegur allt árið um kring en hefur sérstakan sjarma á veturna. Vesturland býður ferðamönnum upp á hrífandi nærveru norðurljósanna þegar þau lýsa upp himininn og varpa ljósi á magnað útsýnið um kring.

Líkar þetta

Fleiri fréttir