Árið 2005 voru Hollvinasamtök Þórðar Halldórssonar frá Dagverðará stofnuð, en það ár voru liðin 100 ár frá fæðingu hans. Markmiðið var að halda á lofti minningu þessa merka sagnamanns og vísnamanns, refaskyttu, málara, sjóara, Jöklara og lífskúnsters. Með því að drekka ölkelduvatn daglega, varð hann næstum 100 ára.

Meðal verkefna Hollvinasamtakanna var að láta gera heimildamynd um Þórð sem Kári G. Schram, kvikmyndaleikstjóri gerði og kallaðist: Jöklarinn. Myndin er einstök heimild um Þórð sem auk margs annars, var einstakur náttúruunnandi og í reynd samofinn umhverfi Snæfellsjökuls að ekki sé talað um Jölkulinn sjálfan.

Á aðalfundi Hollvinasamtaka Þórðar 14. júní síðastliðinn var svo samþykkt að leggja samtökin niður og nýlega stofnað félag – Sagnaseiður á Snæfellsnesi, taki við að halda minningu Þórðar á lofti og kynna frekar heimildamyndina um hann. Einnig munu Svæðisgarður Snæfellsness og Samkomuhúsið á Arnarstapa, koma að þessu hlutverki.

Nú stendur yfir listsýningin Nr. 3 Umhverfing, þar sem yfir sjötíu listamenn sýna verk sín víðsvegar á Snæfellsnesi m.a í bæjarrústunum á Dagverðará. Þar eru á veggjum ljósmyndir af nokkrum málverka Þórðar og eitt þeirra heitir: Snæfellsjökull eftir byl og málað 8. desember 1995 þegar Þórður var 90 ára.

Snæfellsnes hefur alið marga snjalla sagnamenn og sagnaritara og þar er þekktastur Árni prófastur Þórarinsson frá Stóra – Hrauni, en Þórbergur Þórðarson skráði ævisögu hans í sex bindum. Minningar Þórðar Halldórssonar hafa líka verið skráðar og þar er að finna marga góða söguna. Félagið Sagnaseiður á Snæfellsnesi þarf ekki að kvíða verkefnaskorti.

Reynir Ingibjartsson

Hollvinasamtök Þórðar Halldórssonar lögð niður