Síðastliðinn laugardag voru 80 nemendur útskrifaðir úr námi við Háskólann á Bifröst. Nemendahópurinn kom úr viðskiptadeild, félags- og lagadeild og Háskólagátt. Í hátíðarræðu Vilhjálms Egilssonar rektors kom hann inn á breyttar aðstæður á vinnumarkaði og hækkandi menntunarstig þjóðarinnar. „Háskólarnir hafa ekki lokið hlutverki sínu þótt fólk hafi þegar lokið háskólaprófi. Margir vilja eða þurfa að koma aftur í háskóla til að læra eitthvað nýtt eða til að dýpka þekkingu sína og fólk getur byrjað háskólanám á öllum aldri. Háskólinn á Bifröst er nemendadrifinn skóli. Hann er persónulegur skóli. Við lítum á nemendur okkar sem einstaklinga en ekki sem kennitölur. Skólinn er sífellt að breytast. Við bjóðum á hverju ári upp á nýjungar. Sumar falla í kramið en aðrar ekki. En svo margar þeirra hafa hitt í mark að síðastliðið haust voru 80% nemenda í áherslulínum í náminu eða námsfyrirkomulagi sem ekki var boðið uppá fyrir fimm árum,“ sagði Vilhjálmur.

Þá kom rektor einnig inn á aukna alþjóðavæðingu í skólanum. Það er skýr stefnumörkun innan skólans að auka alþjóðlega starfsemi en öllum er jafnframt ljóst að það er mikið þolinmæðisverk og tekur mörg á að byggja slíkt upp. Mikill fjöldi verkefna sem tengjast alþjóðavæðingu eru framundan hjá skólanum. Um 30 erlendir skiptinemar koma í skólann á hverri önn frá samstarfsháskólum, sumarskóli fyrir erlenda nemendur er að festast í sessi og nú er í gangi sérstakt námskeið fyrir FOM háskólann í Þýskalandi með 20 nemendum. Þá koma rússneskir nemendur í heimsókn í skólann næsta haust og er verið að þróa sérstakt nám fyrir erlenda nemendur á ensku sem getur verið ýmist ein önn eða diplomanám í tvær annir.

Verðlaun og útskriftarræður

Útskriftarverðlaun í grunnnámi hlutu Donna Kristjana Peters viðskiptadeild og Hekla Jósepsdóttir, félagsvísinda- og lagadeild. Í meistaranámi hlutu útskriftarverðlaun þær Alma Rún Ólafsdóttir viðskiptadeild og Guðlaug María Lewis í félagsvísinda- og lagadeild. Útskriftarverðlaun í Háskólagátt hlaut Ólöf Sif Ólafsdóttir. Að auki fengu tveir nemendur felld niður skólagjöld á haustönn vegna framúrskarandi námsárangurs þau Bjarni Heiðar Halldórsson viðskiptadeild og Þórhildur Elínardóttir Magnúsdóttir félagsvísinda- og lagadeild.

Ræðumaður fyrir hönd grunnnema viðskiptadeildar var Sigurður Már Sigurðsson og fyrir hönd grunnnema félagsvísinda- og lagadeildar var Linda Pétursdóttir. Fyrir hönd meistaranema í viðskiptadeild flutti Jóna Guðrún Kristinsdóttir ávarp og Magnea Einarsdóttir fyrir hönd meistaranema í félagsvísinda- og lagadeild, þá flutti Thelma Rós Kristinsdóttir ræðu fyrir hönd háskólagáttarnema.

Karlakórinn Söngbræður undir stjórn Viðar Guðmundssonar sá um söngatriði við útskriftina við undirleik Birgis Þórissonar. Að athöfn lokinni þáðu gestir léttar veitingar.

Brautskráning frá Háskólanum á Bifröst