Slökkviliðsbíll í Skorradal. Ljósm. úr safni/ PD.

Óvissustigi lýst yfir vegna hættu á gróðureldum á Vesturlandi

„Vegna langvarandi þurrka á Vesturlandi hefur ríkislögreglustjóri, í samráði við lögreglustjórann á Vesturlandi, lýst yfir óvissustigi almannavarna vegna hættu á gróðureldum,“ segir í tilkynningu frá almannavarnanefnd ríkislögreglustjóra sem send var í gær stjórnendum sveitarfélaganna í landshlutanum og viðbragðsaðilum. „Almannavarnadeild ríkislögreglustjóra, almannavarnir í héraði, ásamt viðbragðsaðilum, hafa áhyggjur af hættu á gróðureldum á Vesturlandi, sérstaklega í Skorradal. Því er talið rétt að lýsa yfir óvissustigi til samræmis við vinnu og viðbrögð þessara aðila.“

Að lýsa yfir óvissustigi er hluti af verkferlum í skipulagi almannavarna, til að tryggja formleg samskipti og upplýsingagjöf milli viðbragðsaðila. „Óvissustig á við þegar grunur vaknar um að eitthvað sé að gerast af náttúru- eða mannavöldum sem á síðari stigum gæti leitt til þess að heilsu og öryggi fólks, umhverfis eða byggðar sé ógnað.“

Í tilkynningunni kemur einnig fram að Veðurstofa Íslands spáir ekki úrkomu á svæðinu næstu vikuna. Þvert á móti er spáð áframhaldandi hlýindum. „Fólk og landeigendur eru beðnir um að sýna aðgát í meðferð opins elds og eldunartækja þar sem mikill gróður er.“

Líkar þetta

Fleiri fréttir

Flugslys í Svefneyjum

Flugslys varð í Svefneyjum á Breiðafirði síðdegis síðastliðinn fimmtudag. Flugvél í flugtaki fékk á sig vindhviðu undir vænginn með þeim... Lesa meira