Lögreglan á Vesturlandi var við umferðarvöktun í umdæminu síðastliðinn fimmtudag. Farið var með myndavélabíl embættisins á þrjá staði þann daginn. Milli klukkan 15:30 og 16:30 mældi lögregla ökuhraða á Vesturlandsvegi við Breiðavík. Alls fóru 135 ökutæki um svæðið þessa klukkustund og tólf reyndust yfir hámarkshraða eða 9%. Tveir voru kærðir fyrir of hraðan akstur, sá sem hraðast ók var á 104 km/klst. en hámarkshraði er 90 km/klst.

Frá klukkan 16:30 til 17:30 vaktaði lögregla umferð á Akrafjallsvegi við Velli. Þar fóru 84 tæki um en 29 voru yfir hámarkshraða. Þrír voru kærðir og sá sem hraðast ók var á 102 km/klst.

Milli kl. 18:00 og 19:00 var vakt við Vesturlandsveg við Hafnargerði. Um svæðið fóru 262 ökutæki. Alls voru 97 yfir leyfilegum hámarkshraða, eða 37%. Sá sem hraðast ók var á 111 km/klst. en alls voru tólf ökumenn kærðir.

Áður hafði verið farið með myndavélabíl embættisins og mældur ökuhraði á Innnesvegi við Akraneshöll, eða mánudaginn 27. maí síðastliðinn. Þar er hámarkshraði lækkaður í 30 km/klst. úr 50 km/klst., þegar ekið er framhjá íþróttasvæði og skóla. Vöktunin stóð yfir frá kl. 16:00 til 17:00. Á þeim tíma voru 111 ökutæki mæld og meðalhraði þeirra var 37 km/klst, eða sjö km/klst yfir leyfilegum hámarkshraða. Alls voru 74 ökutæki yfir leyfilegum hámarkshraða og 19 brot voru kærð, eða 17%. Sá sem hraðast ók var á 54 km/klst.

Aftur var haft eftirlit með umferðarhraða með myndavélabílnum sunnudaginn 2. júní síðastliðinn, þá á Vesturlandsvegi við Bifröst. Alls var hraði 647 ökutækja mældur milli kl. 16:00 og 18:00. Hvorki fleiri né færri en 413 reyndust aka of hratt, eða 64% allra ökumanna. Kærðir voru 244 eða 38% og sá sem hraðast ók var á 119 km/klst. á kafla þar sem hámarkshraði er 70 km/klst. Meðalhraði kærðra var 87,2 km/klst., eða 17,2 km/klst. yfir leyfilegum hámarkshraða.

Margir óku of hratt í umdæminu