Mest hækkun á Vesturlandi sé litið til landshlutanna

Fasteignamat íbúða hækkar hvergi meira frá yfirstanandi ári en á Akranesi, eða um 21,8%, samkvæmt nýju fasteignamati fyrir árið 2020 sem Þjóðskrá Íslands kynnti á miðvikudag. Næstmest hækkar matið í sameinuðu sveitarfélagi Sandgerðis og Garðs (Suðurnesjabæ), eða um 17,7% en um 16,6% í Vestmannaeyjum.

Sé litið til landsins alls hækkar fasteignamat íbúða um 6,0% milli ára. Þar af hækkar sérbýli um 6,6% en fjölbýli um 5,3%. Hækkunin er meiri á landsbyggðinni en í höfuðborginni, eða 9,1% samanborið við 5,0%. Fasteignamat atvinnuhúsnæðis hækkar um 6,9% á landsvísu; um 5,9% á höfuðborgarsvæðinu en um 9,3% á landsbyggðinni. Fasteignamat sumarhúsa er nær óbreytt milli ára, hækkar um 0,7% frá yfirstanandi ári.

Heildarmat fasteigna á Íslandi hækkar um 6,1% á frá yfirstandandi ári. Ef litið er til landshltua er hækkun heildarfasteignamats mest á Vesturlandi, eða 10,2%. Næst mest hækkar matið á Suðurnesjum, eða um 9,8% og þá um 8,0% á Suðurlandi. Ef skoðuð eru einstök bæjarfélög á landinu er heildarhækkunin mest á Akranesi, eða 19,1%, næstmest í Vestmannaeyjum eða 14,7% og þriðja mest í Suðurnesjabæ, 14,2%.

Lækkun í Skorradal

Sé litið til einstakra sveitarfélaga á Vesturlandi má sjá að heildarfasteignamat hækkar alls staðar nema í Skorradal, þar sem það lækkar um hálft prósent. Mest er hækkunin á Akranesi, sem fyrr segir, eða 19,1%. Matið hækkaði um 8,3% í Hvalfjarðarsveit, 7,5% í Stykkishólmi, 6,1% í Helgafellssveit, 5,6% í Borgarbyggð, 5,2% í Dalabyggð, 3,4% í Grundarfirði, 2,7% í Snæfellsbæ og um 2,3% í Eyja- og Miklaholtshreppi. Fasteignamat lækkar hins vegar í Skorradal, um 0,5%, eins og fram kemur hér að ofan.

Fasteignamatið byggir á upplýsingum úr þinglýstum kaupsamningum, auk fleiri þátta sem hafa áhrif á verðmæti fasteigna. Nýtt mat miðast við verðlag fasteigna í febrúar 2019. Það tekur gildi 31. desember 2019 og gildir fyrir árið 2020.

Fasteignamat hækkar mest á Akranesi