Matvælastofnun hefur afturkallað tilkynningu sem send var út í morgun og meðfylgjandi frétt byggði á. Eftir að frétt hefur verið svo lengi í loftinu, sem þessi, er hún ekki tekin út, heldur er hér áfram. Meðfylgandi tilkynning var að berast frá MAST: „Birting fréttar um greiðslur vegna ágangs gæsa og álfta var ótímabær þar sem málið er ekki frágengið. Fréttin hefur verið afturkölluð og verður birt að nýju þegar reglugerðin hefur verið gefin út.“

Næsta haust munu bændur geta sótt um stuðningsgreiðslur ef gæsir og álftir valda með ágangi tjóni á haustuppskeru á korni. Bætur vegna tjóns af völdum ágangs álfta og gæsa á öðru ræktunarlandi bænda verða síðan innleiddar í skrefum á næstu árum samkvæmt innleiðingaráætlun sem Umhverfisstofnun og Matvælastofnun hafa samið.

Innleiðingaráætlunin gerir ráð fyrir að greitt verði fyrir tjón á þroskuðu korni árið 2019, en árið 2020 verður bætt fyrir allt tjón sem álftir og gæsir kunna að valda á kornökrum, frá sáningu og fram að uppskeru. Árið 2021 verður stuðningur veittur vegna tjóns á grasi og grænfóðri fram til 1. maí (vorbeit), en árið eftir muni það ná til haustsins. Að lokum er stefnt að því að hefja stuðningsgreiðslur vegna tjóns á útiræktuðu grænmeti og olíujurtum árið 2023. Það er Búnaðarstofa Matvælastofnunar sem annast greiðslur á stuðningsgreiðslunum. Stuðningur verður reiknaður út frá meðalkostnaði við ræktun hvers hektara og hlutfallslegu tjóni á tjónaskýrslu sem er staðfest af úttektaraðila búnaðarsambanda. Allt tjón á uppskeru sem er metið meira en 20% nýtur stuðnings, og ber framleiðandi ábyrgð á 20% af staðfestu tjóni. Búnaðarstofa ákvarðar árlegan meðalkostnað við ræktun, sem er grunnurinn að útreikningi á stuðningi. Stuðningur vegna ágangs álfta og gæsa nemur að hámarki 5% af árlegri heildarupphæð jarðræktarstyrks samkvæmt fjárlögum.

Afturköllun á frétt! Hægt verður að sækja um bætur vegna tjóns á korni