Sjómannadagurinn verður haldinn hátíðlega um þessa helgi og verður ýmsilegt í boði fyrir alla fjölskylduna á Akranesi, í Grundarfirði og í Snæfellsbæ. Samkvæmd heimildum Skessuhorns verður ekki skipulögð dagskrá í Stykkishólmi að þessu sinni.

Á Akranesi hefst dagskráin á sunnudaginn klukkan 10 með minningarstund við minnismerki um týnda sjómenn, áður en haldið verður í sjómannadagsmessu í Akraneskirkju. Dýfingakeppni Sjóbaðsfélags Akraness verður á gömlu Akraborgarbryggjunni kl. 11 og keppt í tveimur flokkum, yngri en 50 ára og 50 ára og eldri. Dorgveiðikeppni í boði Bíóhallarinnar verður haldin á Sementsbryggjunni. Þá verður róðrarkeppni í boði Gamla Kaupfélagsins. Á hafnarsvæðinu verður fjölskylduskemmtun frá kl. 14-16 þar sem verður m.a. boðið upp á hoppukastala, kassaklifur, bátasmíði og margt fleira fyrir alla fjölskylduna.

Í Grundarfirði hófst sjómannadagsgleðin á miðvikudag með ljósmyndasýningu í Bæringsstofu. Í gær var skeetmót á félagssvæði Skotgrundar í Hrafnkelsstaðarbotni, þar sem sjómenn öttu kappi við landkrabba. Í dag heimsóttu sjómenn Leikskólann Sólvelli og m.a. sýndu krökkunum allskyns furðufiska og skoruðu á krakkana í reiptog. Sómannadagsgolfmótið verður líka á sínum stað á Bárarvelli. Á morgun verður krakkasprell í Vélsmiðju Grundarfjarðar í Ártúni. Varðskipið Þór í höfninni í Grundarfirði yfir helgina og fer í hátíðarsiglingu kl. 12 á laugardeginum. Hátíðarhöld hefjast á hafnarsvæðinu kl. 13, þar sem boðið verður upp á grillaðar pylsur og keppt í ýmsum greinum og margt fleira. Þá verður froðubolti, vígsluathöfn að nýju fiskvinnsluhúsi G.Run og margt fleira í boði. Laugardeginum mun ljúka með dansleik á Kaffi 59. Á sunnudaginn verður Leikhópurinn Lotta með sýningu. Sjómannaguðsþjónusta verður í Grundarfjarðarkirkju, Runólfur Guðmundsson og Sigurjón Halldórsson, fyrrum skipstjórar, verða heiðraðir fyrir störf sín og margt fleira verður í boði.

Í Snæfellsbæ verður dagskrá alla helgina og hefst hún með skemmtisiglungu í kvöld. Í Sjómannagarðinum í Ólafsvík verður grillveisla, hoppukastalar og fleira. Á laugardeginum verður dorgveiðikeppni á Norðurgarði í Ólafsvík. Í Rifi verður skemmtun fyrir alla fjölskylduna, kappróður, flekahlaup, þrautakeppni, reiptog og margt fleira. Boðið verður upp á fiskisúpu og hoppukastala. Sjómannahóf verður í Klifi um kvöldið þar sem boðið verður upp á mat frá Galito. Sóli Hólm sér um veislustjórn og hljómsveitin Bandmenn munu halda uppi stuði fram á nótt. Á sunnudaginn verður sjómannamessa og sjómenn verða heiðraðir. Hátíðardagskrá verður í sjómannagörðunum í sveitarfélaginu og Leikhópurinn Lotta verður með sýningu í Tröð kl. 15:30.

Sjómannadagurinn haldinn hátíðlegur um helgina