Fjölmennur kynningarfundur um þangvinnslu var haldinn í Amtsbókasafninu í Stykkishólmi í gærkveldi. Þar var kynnt skýrsla ráðgjafanefndar um rannsóknar-, vinnslu- og afurðamiðstöð þangs í Stykkishólmi. Ráðgjafanefndin leggur til að hafnar verði viðræður við kanadíska fyrirtækið Acadian Seaplants Ltd., hafi bæjaryfirvöld hug á að þangvinnsla hefjist í Stykkishólmi. Íslenska kalkþörungafélagið ehf. hafði einnig lýst yfir áhuga á vinnslu í bænum.

Hugmyndir og áform um þangvinnslu í Stykkishólmi hafa verið til umræðu og meðferðar hjá bæjaryfirvöldum um nokkurra ára skeið. Hrafnhildur Hallvarðsdóttir, forseti bæjarstjórnar, fjallaði á fundinum um það sem hefur gerst á þessu kjörtímabili og Jakob Björgvin Jakobsson bæjarstjóri fór yfir aðkomu bæjarins að þessum málum.

Halldór Árnason, formaður ráðgjafanefndarinnar, kynnti skýrsluna og greindi frá niðurstöðum nefndarinnar. Í máli hans kom fram að margir fyrirvarar eru á því hvort vinnsla á þangi muni hefjast í Stykkishólmi, meðal annars á alveg eftir að semja við landeigendur um nýtingu á þangi á þeirra landareign, en þang er slegið innan netalaga.

Styrkir búsetuskilyrði

Nefndin telur að þörungavinnsla í Stykkishólmi komi til með að styrkja búsetuskilyrði í bænum, auka fjölbreytni atvinnulífs og styrkja rekstrargrundvöll margra þjónustufyrirtækja. Þegar verksmiðjan verður komin í full afköst gæti störfum fjölgað um 20, auk átta afleiddra starfa. Áætlað er að fjárhagslegur ávinningur Stykkishólmsbæjar geti numið um 30 milljónum króna auk afleiddra tekna.

Þá telur nefndin sömuleiðis að þörungavinnsla í Stykkishólmi gæti orðið til þess að auka rannsóknir á lífríki Breiðafjarðar og sjálfbæra nýtingu sjávarfangs úr firðinum. Grundvallaratriði sé að nýta allt hráefni vel og að öflun þess sé sjálfbær. Stefna þurfi að því að hámarka virði hráefnisins og vinna stöðugt að þróun betri afurða og vinnslu efna úr því.

Nefndin telur það miklu skipta fyrir bæinn að fyrirtæki sem reisi þörungavinnslu í Stykkishólmi sé tilbúið að skuldbinda sig til að byggja upp vinnslu með vísindalegri nálgun við hlið hinnar vinnslunnar. Æskilegt væri að fyrirtækið setti ákveðið hlutfall af tekjum sínum í rannsóknir og þróun.

Rætt verði við Kanadamennina

Ef bæjaryfirvöld hyggjast halda áfram viðræðum um þangvinnslu í Stykkishólmi leggur nefndin til að samið verði við kanadíska fyrirtækið Acadian Seaplants Ltd. Einnig hafði Íslenska kalkþörungafélagið, sem er í eigu Marigot á Írlandi, lýst yfir áhuga á þörungavinnslu í bænum. Nefndin telur bæði fyrirtækin hafa burði og reynslu til að koma á vinnslu í Stykkishólmi. Var niðurstaðan sú að nefndin telur kanadíska fyrirtækið hafa meiri burði og vísindalega þekkingu og reynslu til að koma vinnslunni fót og styðja við rannsóknir á efnisinnihaldi þara og þangs með virðisaukandi framleiðslu að leiðarljósi. Því mælir nefndin með því að bæjaryfirvöld ræði fyrst við Acadian Seaplants Ltd., verði ákveðið að halda áfram með málið.

Kanadíska fyrirtækið hefur lýst sig reiðubúið að greiða fyrir ferð bæjarfulltrúa til Kanada til að skoða þangverksmiðju í þeirra eigu þar. Einn fundargesta, Grétar Pálsson, hafði orð á því á fundinum að stíga ætti varlega til jarðar við að þiggja slík boð.

Helgi Árnason, formaður ráðgjafanefndarinnar, í ræðustól.

Vel sóttur kynningarfundur um þangvinnslu