Boðað er til íbúafundar í Amtsbókasafninu í Stykkishólmi kl. 18:00 í kvöld. Efni fundarins er niðurstaða ráðgjafanefndar vegna áhuga á rannsóknar-, vinnslu- og afurðamiðstöð þangs í Stykkishólmi.

Hugmyndir og áform um þörungavinnslu í Stykkishólmi hafa verið til umræðu og meðferðar hjá stjórnendum bæjarins um nokkurra ára skeið. „Um er að ræða hugmyndir að nýtingu auðlinda Breiðafjarðar og atvinnuuppbyggingu í Stykkishólmi, nánar tiltekið nýtingu þangs í Breiðafirði, þar sem hugmyndir um sjálfbæra nýtingu auðlinda fjarðarins hefur verið grundvöllur samtals við þau fyrirtæki sem sýnt hafa verkefninu áhuga,“ segir Jakob Björgvin Jakobsson bæjarstjóri á vef Stykkishólmsbæjar. Tvö fyrirtæki hafa farið þess á leit við bæjarstjórn að hafist verði handa við formlega skipulagningu atvinnusvæðis fyrir þörungavinnslu; annars vegar kanadíska fyrirtækið Acadian Seaplants Ltd. og hins vegar Íslenska kalkþörungafélagið ehf., sem er í írskri eigu.

Skipuð var ráðgjafanefnd vegna áhuga á rannsóknar-, vinnslu og afurðamiðstöð þangs í Stykkishólmi í desember. Var henni ætlað að fara yfir og meta fyrirliggjandi gögn varðandi fyrirhugaða starfsemi, leggja mat á kosti hennar og galla og fjárhagslegan ávinning bæjarins ef af verður. Einnig var henni falið að útfæra tillögur að viðmiðum Stykkishólmsbæjar í áframhaldandi viðræðum, leggja fram tillögu að staðsetningu starfseminnar og hugsanlegum skipulagsbreytingum. Nefndin hefur lokið störfum og skilað greinagerð til bæjarstjórnar.

„Á íbúafundinum mun bæjarstjóri fara lauslega yfir aðdraganda og framvindu í tengslum við áform um þangvinnslu í Stykkishólmi og þá mun Halldór Árnason, formaður ráðgjafanefndarinnar, kynna niðurstöðu skýrslu nefndarinnar,“ segir Jakob.

Íbúafundur um þörungavinnslu í kvöld