Nú í vor lét Akraneskaupstaður setja upp tíu bekki með jöfnu millibili við göngustíginn meðfram Langasandi, frá Dvalarheimilinu Höfða að Faxabraut. Nú geta íbúar á Höfða því notið þess að ganga meðfram Langasandi og tyllt sér á bekkina til að hvíla sig á leiðinni. Að sögn Sindra Birgissonar, umhverfisstjóra hjá Akraneskaupstað, er það vilji bæjarins að aðgengi allra að þessu svæði verði gott og eru bekkirnir liður í því.

„Við eigum aðeins eftir að klára frágang við bekkina en það er mikilvægt að það verði gott aðgengi að bekkjunum fyrir alla,“ segir Sindri. Þá segir hann ýmislegt á dagskrá til að lífga upp á svæðið, bæta gæði svæðisins og auka afþreyingarmöguleikana. „Við þyrftum að hækka og breikka stíginn og bæta lýsinguna, en þetta þarf allt að vera skoðað í heild,“ segir Sindri. Fyrirhugað er á næstu vikum að setja upp hreystigarð fyrir neðan Akraneshöllina, hjá ærslabelgnum. „Hreystitækin henta öllum, óháð aldri eða daglegum venjum. Sett verða upp átta líkamsræktartæki með upplýsingaskilti þar sem hægt verður að sjá hvernig megi nota tækin til líkamsræktar. „Við munum líka setja niður plöntur hér í kring og gera fínt og vonandi skapa skjól,“ segir Sindri.

Þá var einnig komið fyrir nýju húsi við Guðlaugu á þriðjudaginn í síðustu viku, en þar á að vera aðstaða fyrir starfsmenn Guðlaugar og salerni fyrir gesti. „Það verður afgreiðsla í húsinu og tvö salerni, þar af eitt með aðgengi fyrir hjólastóla,“ segir Sindri. Áætlað er að húsið verði tekið í notkun í byrjun júní. Aðspurður segir Sindri aðsókn í Guðlaugu hafa verið mjög góð frá opnun og segist hann bjartsýnn fyrir sumrinu. „Ég hef ekki nákvæmar tölur um heimsóknir í Guðlaugu en ég veit að það hefur verið mjög góð aðsókn, betri en búist var við,“ segir hann.

Unnið að bættu útivistarsvæði við Langasand