Fyrir ekki svo löngu voru stofnuð Hollvinasamtök fyrir Hallgrímskirkju í Saurbæ á Hvalfjarðarströnd með það að markmiði að blása lífi í staðinn. Farið er að sjá á húsakosti að sögn Jóseps Gíslasonar sem er frukvöðull að stofnun félagsins. „Ég var þarna í fyrrasumar að hreinsa steina og legsteina á gröfum ættingja og tók eftir því hvað kirkjan var orðin dapurleg ásjónar,“ segir hann.

Góðar aðstæður til tónleikahalds

Hugmyndin er að halda tónleikaröð í kirkjunni þar sem allur ágóði mun renna til styrktar staðnum og hjálpa þannig til við viðhald á kirkjunni og umhverfinu í kring. „Þetta er sögulega og menningarlega mikilvægur staður fyrir Íslendinga og með tónleikahaldi væri hægt að vekja frekari athygli á þessu svæði og fá fólk hingað til okkar. Húsið er með gott orgel, fínan flygil og mjög góðan hljómburð,“ segir Jósep um aðstæður. Með honum í þessu verkefni eru Alexandra Chernyshova sópransöngkona, systkinin Valdís Inga Valgarðsdóttir og Jón Valgarðsson ásamt Ástu Jenný Magnúsdóttur. Síðustu þrjú eru í sóknarnefnd staðarins. „Það er búið að ganga vel í undirbúningnum og við erum búin að fá góðar undirtektir, svo verður bara að koma í ljós hvernig mætingin verður,“ segir Jósep. Stefnt er að því að halda ferna tónleika í sumar og fyrstu tónleikarnir verða haldnir núna á sunnudaginn 12. maí kl. 16 þegar Guðmundur Sigurðsson organisti spilar nokkur vel valin verk á orgelið. Þá mun kór kirkjunnar flytja nokkur lög í upphafi tónleikanna.

Tónlistarfólk sem hefur áhuga á tónleikahaldi í kirkjunni er hvatt til að hafa samband í gegnum Facebook síðu hollvinasamtakanna undir nafninu, Tónleikar til styrktar Saurbæjarkirkju í Hvalfirði. Þar er einnig hægt að fylgjast með tímasetningu næstu tónleika sem eins og fyrr segir verða fernir yfir sumarið.

Tónleikaröð til styrktar Hallgrímskirkju í Saurbæ