Laugardaginn 27. apríl síðastliðinn var umfangsmikil hópslysaæfing viðbragðsaðila á Vesturlandi haldin á Snæfellsnesvegi á móts við Kaldármela. Undirbúningur að æfingunni hafði staðið í nokkra mánuði en þátt í henni tóku lögregla, björgunarsveitir, slökkvilið, sjúkraflutningafólk, Landhelgisgæslan og félagar í Rauða kross deildum. Komið var upp slysavettvangi þar sem bæði hópferðabíll og fólksbílar höfðu lent í árekstri. Voru eldar kveiktir á svæðinu og sem mest gert til að gera æfinguna sem líkasta vettvangi raunverulegs stórslyss. Fjöldi sjálfboðaliða tók þátt og lék slasaða. Um 120 viðbragðsaðilar tóku þátt í æfingunni sem gerir hana um leið með þeim stærri sem haldnar hafa verið á Vesturlandi.

Staðsetning æfingarinnar var talin heppileg fyrir ýmsar sakir. Hún var miðsvæðis fyrir þátttakendur allt frá Akranesi, Borgarfirði, Snæfellsnesi og Dölum, en var til hliðar við þjóðveginn og olli því ekki miklu raski fyrir almenna umferð. Söfnunarsvæði fyrir slasaðra var komið upp í félagsheimilinu Lindartungu og þá var aðgerðastjórn sett upp í nýrri aðstöðu á lögreglustöðinni í Borgarnesi. Þyrla Landhelgisgæslunnar kom á svæðið og hafði það hlutverk að flytja mest slasaða frá slysavettvangi. Samhæfingarstöðin í Skógarhlíð var auk þess virkjuð enda slíkt gert ef til stórslyss af þessu tagi kæmi. Í lok æfingar var öllum þátttakendum boðið í súpu í Lindartungu og þar fór fram rýnifundur viðbragðsaðila um hvernig til tókst.

Kolbrún Ingvarsdóttir ljósmyndari Skessuhorns fylgdist með aðgerðum á vettvangi æfingarinnar. Nokkrar mynda hennar má sjá hér á síðunni.

Myndasyrpa – hópslysaæfing á Vesturlandi