„Eins og venjulega er tilhlökkun og spenna í mannskapnum. Við erum vel stemmdir og vonum að við getum gert góða hluti í sumar,“ segir Ejub Purisevic, þjálfari Víkings Ó., í samtali við Skessuhorn. Víkingur Ó. hefur leik í Inkasso deild karla í knattspyrnu næstkomandi sunnudag, 5. maí, þegar liðið mætir Gróttu á Ólafsvíkurvelli. Liðið er mikið breytt frá fyrra ári og leikmenn hafa verið að bætast við hópinn þar til rétt fyrir mót. „Við notuðum mikið af ungum strákum á undirbúningstímabilinu. Það gerðum við viljandi, vildum gefa þeim fleiri leiki og fleiri mínútur, strákarnir þurfa að fá þessa reynslu sem þeir fengu í vetur til að vaxa sem leikmenn,“ segir Ejub. „En auðvitað er erfitt að missa marga leikmenn á milli ára. Hópurinn er mikið breyttur og farnir margir þeirra sem drógu vagninn á síðasta ári og skoruðu mörkin,“ bætir hann við. „Það tekur stundum tíma að fá nýja leikmenn og það hefur gengið hægar en í fyrra. Núna er markmiðið okkar að ná jafn stórum hópi og í fyrra og vonandi tekst það, því við erum enn að bæta í hópinn. Best væri ef við gætum haldið 15 manns á milli ára og byggt ofan á það, en svona er þetta bara. Leikmenn í dag koma og fara og það eru alltaf stærri klúbbar sem vilja þá sem standa sig vel. Það er ekkert að því og bara eðlilegt að menn vilji reyna sig annars staðar líka,“ segir þjálfarinn.

Bætt aðstaða skilar sér í framtíðinni

Liðinn vetur er sá fyrsti sem Víkingur Ó. hefur átt þess kost að æfa á nýja gervigrasinu í Ólafsvík á meðan undirbúningstímabilinu stendur. Ejub telur að bætt aðstaða komi til með að hafa mikið að segja til framtíðar. „Fyrir jól gátum við nánast alltaf farið út á völl að æfa en það var erfiðara eftir jólin, mikill snjór og leiðinlegra veður. Það var síðan ekki fyrr en í mars að við komumst út aftur. En þetta er betra en hefur verið undanfarin ár, ekki spurning. En eins og í öllu þá þurfum við meiri tíma til að sjá alla kostina við bætta aðstöðu koma í ljós. Ég er ekki í vafa um að þetta muni skila sér í framtíðinni,“ segir hann. „En við búum auðvitað auðvitað áfram við það sem er svolítið öðruvísi en hjá klúbbum á Akranesi eða í Reykjavík; hluti hópsins er fyrir sunnan yfir veturinn, margir ungir strákar í námi og svoleiðis. Þannig að venjulega fáum við hópinn ekki til okkar í Ólafsvík nema rétt fyrir mót eða jafnvel bara þegar mótið er að byrja. Þá byrjum við að vinna í hlutum sem væri betra að vera að fara yfir í mars,“ segir hann léttur í bragði. „En svona er þetta bara, við verðum bara að taka þessu eins og þetta er og reyna að gera það besta úr stöðunni,“ bætir hann við.

Berjast fyrir hverjum bolta

Aðspurður vill þjálfarinn ekki gefa upp nein markmið um árangur í aðdraganda mótsins, heldur bíða og sjá hvernig sumarið fer af stað. „Ég er þannig týpa að mig langar alltaf að vera í efri hlutanum í öllum deildum, en helsta markmiðið núna er að ná stöðugleika í leikmannahópinn. Ef hópurinn síðan smellur saman þá gætum við farið að huga að stærri hlutum,“ segir Ejub. „Fyrst er að ná svipuðum hópi og í fyrra og vonandi góðum gæðum. Þá sjáum við hvort við erum með lið sem getur ekki barist um efstu sætin í deildinni. Það er ómögulegt að setja fram stór markmið í upphafi mótsins, í ljósi aðstæðna. Vonandi getum við gert eins og í fyrra en það verður bara að koma í ljós. Þá misstum við líka marga leikmenn en vorum einhvern veginn miklu fyrr komnir með kjarnann í liðinu saman, bara um miðjan mars, en núna tók þetta aðeins lengri tíma. En þetta kemur fljótlega í ljós eftir að mótið fer af stað, eftir sex til sjö umferðir kannski, hvað við getum gert í sumar,“ segir hann. „Einu get ég þó lofað og það er að við munum koma vel stemmdir inn í mótið, berjast fyrir hverjum einasta bolta og hverju einasta stigi og gefa allt sem við eigum. Við leggjum okkur fram og getum vonandi gert eins góða hluti í sumar og við höfum verið að gera undanfarin ár,“ segir Ejub Purisevic að endingu.

„Tilhlökkun og spenna í mannskapnum“