Tugir ungmenna sitja nú ráðstefnu í Borgarnesi sem Ungmennaráð UMFÍ stendur að. Yfirskrift ráðstefnunnar í ár er; „hvernig get ég verið besta útgáfan af sjálfum mér?“ Á ráðstefnuna taka um 80 ungmenni á aldrinum 14-25 ára þátt en þau sitja í ungmennaráðum á öllu landinu. Þarna koma þau saman á ópólitískum vettvangi og ræða málefni líðandi stundar. Ráðstefnunni lýkur í dag með pallborðsumræðum þar sem m.a. Lilja Dögg Alfreðsdóttir menntamálaráðherra situr fyrir svörum.

Við setningu þingsins í gær flutti Þórdís Kolbrún R Gylfadóttir ráðherra ávarp. „Fólk á alltaf að treysta eigin innsæi en samt vera tilbúið til að hlusta á gagnrýni og vera tilbúið til að skipta um skoðun. Fullorðnu fólki finnst mjög erfitt að vera það sjálft. En maður má ekki tapa gleðinni heldur vera maður sjálfur,“ sagði hún. Í ávarpi sínu vitnaði Þórdís til forngríska heimspekingsins Sókratesar sem uppi var fyrir um þrjú þúsund árum, en hann var dæmdur til dauða fyrir að hvetja unga karlmenn til þess að hugsa á gagnrýninn hátt. Rifjaði hún upp að sjálf hafi hún eitt sinn unnið fyrir Ólöfu Nordal. Hjá Ólöfu hafi hún m.a. lært að hlusta á maga sinn, fylgja innsæinu og vera gagnrýnin. Á sama tíma á fólk ekki að gefa sér að allir viti betur en það sjálft. Þar skipti innsæið mestu máli.

Betra að stökkva

Þórdís er sjálf brautryðjandi á ýmsum sviðum. Hún er yngsti varaformaður Sjálfstæðisflokksins og yngsta konan til að gegna embætti ráðherra hér á landi. Hún hafi heyrt að ungt fólk eigi að bíða með að koma sér áfram og spyrja spurninga. Hún viðurkenndi að í fyrstu hafi sér fundist eins og hún hafi átt að passa inn í ákveðið form, form sem hamli því að fólk hagi sér eða framkvæmi á annan hátt en tíðkist. Það hamli framförum og gagnrýninni hugsun. „Ég sé stundum fyrir mér piparkökukarl í formi. En maður þarf að taka plássið sem þarf. Piparkökukallinn er ekki endilega svarið.“ Þórdís hvatti þátttakendur á ráðstefnunni til að vera óhrædda við að hugsa á gagnrýninn hátt og vera óhræddir að betrumbæta heiminn. Ungt fólk sé framtíðin. „Besta dæmið um þessar mundir er hin sænska Greta Thunberg, sem vakið hefur fólk um allan heim til umhugsunar um mikilvægi loftslagsmála. Afstaða hennar að ferðast ekki með flugvélum hefur mótað fólk,“ sagði Þórdís og hvatti þátttakendur til að láta til sín taka, ekki hlusta á úrtöluraddir og þora að taka áhættu: „Það er mjög gott að spyrja, stundum ekki endilega gáfulega. Við þurfum ekki að hafa svörin heldur kunna að spyrja spurninganna. Ég hef verið rökföst, fylgt minni sannfæringu og verið ég sjálf. Ef það er eitthvað sem ég get ráðlagt ykkur er að grípa öll þau tækifæri sem gefast. Líka þau sem virðast of stór. Ef þið standið frammi fyrir því að hrökkva eða stökkva, þá mæli ég með því að stökkva. Það skilar manni lengra,“ sagði Þórdís Kolbrún í ávarpi sínu til íslenskra ungmenna.

Ungmennaráðstefnu lýkur í Borgarnesi í dag