Í gær voru Landgræðsluverðlaunin 2019 afhent á ársfundi Landgræðslunnar sem fram fór í Reykjavík. Landgræðsluverðlaunin eru veitt árlega einstaklingum og félagasamtökum sem hafa unnið að landgræðslu og landbótum. Með veitingu verðlaunanna vill Landgræðslan vekja athygli á mikilvægu starfi margra áhugamanna að landgræðslumálum. Verðlaunagripirnir, Fjöregg Landgræðslunnar, eru unnir af Eik-listiðju á Miðhúsum á Fljótsdalshéraði, og eru fagurlega útskorin egg. Verðlaunahafar að þessu sinni voru þrír. Í fyrsta lagi Haukur Engilbertsson bóndi á Vatnsenda í Skorradal. Fjörulallar í Vík í Mýrdal hljóta verðlaun, en það er hópur sjálfboðaliða sem unnið hefur ötullega við sandfoksvarnir við kauptúnið í Vík í nánu samstarfi við Landgræðsluna. Loks fær Lionsklúbbur Skagafjarðar, ásamt ábúendum að Goðdölum í Skagafirði þeim Smári Borgarssyni og Sigríði Sveinsdóttir, verðlaun fyrir uppgræðslu lítt gróinna og uppblásinna svæða á Goðdalafjalli í Skagafirði.

Haukur á Vatnsenda

Haukur Engilbertsson á Vatnsenda í Skorradal byrjaði um 1970 á uppgræðslu með því að dreifa heyi og moði á gróðursnauða mela í landi sínu. Um 1980 var slóði lagður upp á Skorradalsháls og tilbúinn áburður borinn á brekkurnar. Árið 1985 fór hann að leigja út sumarbústaðalóðir og ákvað að nota hluta af leigutekjunum í áburðarkaup til uppgræðslu og gerir það enn. Árið 1995 hóf Haukur þátttöku í verkefninu Bændur græða landið en í dag styrkir Landgræðslan Hauk til kaupa á þremur tonnum af áburði en alls ber hann á landið um 9-10 tonn á hverju ári.

Í umsögn Landgræðslunnar um verðlaunin segir jafnframt: „Haukur á einnig jörðina Gröf í Lundarreykjadal sem liggur að Vatnsenda uppi á Skorradalshálsi. Þökk sé Hauki er láglendi jarðanna orðið vel gróið og hann farinn að færa sig ofar í brattar brekkurnar en hefur þó enn ekki tekist að velta traktornum og segist komast allt með því að keyra nógu hægt. Haukur girti jarðirnar af og hefur sínar rúmlega 200 kindur heimavið, innan girðingar. Beitin hefur ekki neikvæð áhrif á uppgræðslu Hauks og er gróður í mikilli framför og lömbin væn. Haukur varð áttræður á síðasta ári en gaf ekkert eftir í sínu ötula landgræðslustarfi og er hvergi nærri hættur. Haukur er öðrum landeigendum til fyrirmyndar og á svo sannarlega skilið að fá viðurkenningu Landgræðslunnar, fyrir vel unnið ævistarf.“

Haukur á Vatnsenda meðal handhafa Landgræðsluverðlauna