Verktakinn Work North ehf. hóf í liðinni viku niðurrif á veggnum umhverfis sandþró Sementsverksmiðjunnar á Akranesi. Þar með sér fyrir endann á niðurrifi mannvirkja verksmiðjunnar, í það minnsta í þessum áfanga. Eins og íbúar þekkja prýða listaverk austurhlið veggjarins. Þessi verk eiga sér sögu.

Í upphafi níunda áratugarins, frá tíma Barnaskóla Akraness, efndi Sementsverksmiðjan til samkeppni um skreytingu á vegginn og haft var samband við skólann. Haldin var samkeppni meðal nemenda í elsta bekk skólans og lagt upp með klippiverkefni sem nemendur skólans unnu í mynd- og handmenntatímum. Hugmyndina að því listaverki sem varð fyrir valinu átti Gísli Eyleifsson. Í gang fór heilmikil vinna við að koma teikningunni á vegginn. Fengin var papparúllu í stærðinni 2×50 metrar frá Kassagerðinni og var verkið teiknað í raunstærð á pappann í sal Íþróttahússins við Vesturgötu. Allir nemendur í elsta bekk barnaskólans tóku þátt í því. Formin voru síðan klippt út og límd á vegginn þar sem teiknað var eftir þeim. Loks var ráðist í málningarvinnuna sjálfa. Kennarar sem stjórnuðu verkinu voru Bjarni Þór Bjarnason, Hanna Jóhannsdóttir og Hildrud Hildur Guðmundsdóttir. Málningin var frá Nordsjö.

Niðurrif veggjarins við Faxabraut hófst á fimmtudaginn og var nú í morgun búið að fella hann og unnið við að hreinsa járnabindinguna úr steypunni.

Listaverk gamalla barnaskólanemenda að hverfa