Opinn fagráðsfundur í sauðfjárrækt var haldinn í Bændahöllinni fyrir skemmstu. Þar voru meðal annars veitt verðlaun til ræktenda þeirra sæðingastöðvahrúta sem þykja hafa skarað fram úr. Sæðingastöðvarnar gefa verðlaunin en það er í höndum faghóps Rannsóknarmiðstöðvar Landbúnaðarins að velja hrútana út frá árangri þeirra. Hrúturinn Mávur 15-990 frá Mávahlíð á Snæfellsnesi valinn besti lambafaðirinn árið 2018. Herdís Leifsdóttir og Emil Freyr Emilsson tóku við viðurkenningunni fyrir hrútinn.

Við val á besta lambaföðurnum er horft til þess hvaða sæðingahrútur kom best út sem lambafaðir síðastiðið haust. Miðað er við ákveðin lágmörk gagnvart kynbótamati og þungaeinkunn, fullstiguð hrútlömb þurfa að vera fleiri en eitt hundrað og síðan er litið sérstaklega á niðurstöður úr ómmælingum og stigun.

Mávur var fenginn til notkunar á sæðingastöðvunum haustið 2017, að aflokinni afkvæmarannsókn fyrir úrvalshrúta á Snæfellsnesi. „Mávur sýndi þar mjög skýra yfirburði sem lambafaðir. Mávur hefur verið tvo vetur í notkun á stöðvunum og bæði árin verið meðal þeirra hrúta sem bændur hafa sótt mikið í að nota,“ segir í umsögn faghópsins. „Afkvæmi Mávs eru ákaflega jafnvaxin og sameina afar vel góða gerð, hóflega fitu og ágætan vænleika. Allmörg þeirra hafa erft hreinhvíta og kostaríka ull föður síns og hann því einnig öflugur kynbótahrútur hvað ullargæði varðar. Mávur stendur nú í 116 stigum í kynbótamati fyrir gerð og 118 stigum fyrir fitu. Í uppgjöri fjárræktarfélaganna 2018 fær hann 119 í fallþungaeinkunn fyrir afkvæmi sín. Mávur er frábær lambafaðir gagnvart öllum helstu eiginleikum sem horft er til við líflambaval.“

Besti reyndi kynbótahrúturinn var valinn Dreki 13-953 frá Hriflu í Þingeyjarsveit og tóku þau Vagn Sigtryggsson og Margrét Snorradóttir á móti verðlaunum fyrir hann.

Mávur frá Mávahlíð er lambafaðir ársins