Ársreikningur Borgarbyggðar fyrir árið 2018 var lagður fram á fundi byggðarráðs í gær og verður tekinn til fyrri umræðu í sveitarstjórn 11. apríl. Í tilkynningu frá byggðarráði kemur fram að niðurstaða ársreiknings sýni að fjárhagur Borgarbyggðar standi traustum fótum. Rekstrarniðurstaða ársins fyrir samstæðu A og B hluta er jákvæð um 502 milljónir króna sem er um 290 milljóna betri afkoma en ráð var fyrir gert í fjárhagsáætlun ársins. „Bætt afkoma skýrist fyrst og fremst af auknum tekjum vegna hærri launatekna íbúa og meiri umsvifum í sveitarfélaginu. Afskriftir og fjármagnskostnaður eru einnig lægri en ráð var fyrir gert. Miklu máli skiptir einnig í þessu sambandi að það náðist að halda rekstri málaflokka í mjög góðu samræmi við upphaflega fjárhagsáætlun,“ segir í tilkynningu.

Helstu kennitölur fyrir samstæðu A og B hluta eru þær að tekjur ársins námu 4.299 m.kr. Launakostnaður var 2,177 m.kr. og annar rekstrarkostnaður var 1,363 m.kr. Framlegð nemur 710 m.kr. Veltufé frá rekstri er 681 m.kr. eða 15,9% af tekjum. Eigið fé í árslok nam því 3.639 m.kr. og eiginfjárhlutfallið er 45,46%. Veltufjárhlutfall er 1,8. Skuldaviðmið fer hratt lækkandi og er 42,6%. Það er því vel innan þess 150% hámarks sem kveðið er á um í lögum. Skuldahlutfall er 102% og hefur lækkað ár frá ári að undanförnu.

„Öflugur rekstur og sterk fjárhagsstaða auðveldar samfélaginu að taka vel á móti nýjum íbúum og tryggja öllum góða þjónustu. Unnið er markvisst að uppbyggingu innviða í Borgarbyggð. Stærsta verkefnið sem sveitarfélagið hefur með höndum er endurbætur og viðbygging við Grunnskólann í Borgarnesi sem hófst á síðasta ári. Fyrir liggur síðan í ár að hefja uppbyggingu leikskólans Hnoðrabóls á Kleppjárnsreykjum og leggja ljósleiðara um dreifbýli Borgarbyggðar.“ Íbúum í Borgarbyggð hefur fjölgað um nær 300 frá árinu 2015. Þeir voru 3.816 um síðustu áramót og nam fjölgunin 3,7% á milli ára. Hjá sveitarfélaginu störfuðu 344 í 269 stöðugildum í árslok 2018. Það er því sem næst sami fjöldi og á árinu 2017.

Ábyrgur rekstur málaflokka

„Rekstur málaflokka gekk vel og er í ágætu samræmi við upprunalega fjárhagsáætlun fyrir árið. Rekstrargjöld án afskrifta og fjármagnsliða námu 3.589 m.kr. en samkvæmt fjárhagsáætlun var gert ráð fyrir að verja 3.539 m.kr. til reksturs málaflokka. Frávikið er 50 milljónir sem er 1,4% af fjárhagsáætlun.

Fræðslumál eru sem fyrr langstærsti málaflokkur sveitarfélagsins. Til hans var varið 1.828 milljónum eða 50,9% skatttekna. Til félagsþjónustu var veitt 404 milljónum og eru þar meðtalin framlög vegna málefna fatlaðs fólks. Æskulýðs- og íþróttamál eru þriðja umfangsmesta verkefni sveitarfélagsins en til þeirra var ráðstafað um 303 m.kr. Til fræðslu-, félagsþjónustu og íþrótta- og tómstundamála er því varið um 70,7% skatttekna Borgarbyggðar.

Hálfur milljarður í rekstrarafgang hjá Borgarbyggð