Bagaleg mistök sem nauðsynlegt er að leiðrétta – segir sveitarstjóri

Nokkur umræða hefur skapast í Borgarbyggð um meintan stórmun á meðallaunakostnaði í grunnskólum í sveitarfélaginu. Meðal annars minntist Guðsteinn Einarsson á málið í aðsendri grein í Skessuhorni í þessari viku. Gunnlaugur A Júlíusson sveitarstjóri vill koma á framfæri leiðréttingu vegna málsins og tekur fram að eðlilegt sé að þessi misskilningur hafi fengið vængi í ljósi þess að hinn meinti launamunur hafi komið fram í Skólavoginni, heimild sem undir eðlilegum kringumstæðum ætti að vera hægt að treysta. „Sem betur fer er þetta hins vegar ekki raunveruleikinn,“ segir Gunnlaugur í samtali við Skessuhorn. Í skýrslu Skólavogarinnar stóð að meðallaunakostnaður í Grunnskóla Borgarfjarðar væri um milljón krónum hærri á hvern nemanda heldur en í Grunnskóla Borgarbyggðar. Hið rétta er að meðallaunakostnaður á nemanda í Borgarbyggð er 1.606 þúsund krónur. Meðallaunakostnaður í Grunnskólanum í Borgarnesi er 1.440 þúsund krónur en 1.772 þúsund krónur í Grunnskóla Borgarfjarðar. Munurinn er 23% sem er mun eðlilegra í ljósi fámennra sveitaskóla annars vegar og þéttbýlisskóla hins vegar. Meðallaunakostnaður í landinu öllu á nemanda er hins vegar 1.220 þúsund krónur

Mistök við úrvinnslu gagna

Gunnlaugur Júlíusson segir að fyrrgreindar upplýsingar um mikinn mun á meðallaunakostnaði grunnskólanna í Borgarbyggð hafi birst í Skólavoginni, en Skólavogin er einkafyrirtæki sem vinnur og birtir upplýsingar um grunnskóla landsins. „Starfsfólk Borgarbyggðar óskaði eftir upplýsingum og skýringum frá þeim sem höfðu unnið fyrrgreinda útreikninga og birt þá. Nú í vikunni fékkst loks staðfest að Skólavogin hafði víxlað upplýsingum um launakostnað í Grunnskólanum í Borgarnesi og Grunnskóla Borgarfjarðar. Þannig deildi Skólavogin heildarlaunakostnaði í Grunnskólanum í Borgarnesi út á hvern nemanda í Grunnskóla Borgarfjarðar sem eru töluvert færri en í Borgarnesi. Svo var á hinn bóginn heildarlaunakostnaði í Grunnskóla Borgarfjarðar deilt út á hvern nemenda í Grunnskólanum í Borgarnesi (sem eru töluvert fleiri en í G.Bfj). Þannig voru útreikningarnir rangir á báða vegu og munur á meðallaunum því afar mikill milli skólanna þegar niðurstaðan var birt.“

Gunnlaugur segir þessar röngu upplýsingar slæmar fyrir sveitarfélagið en út frá þeim hafi einhverjir nú þegar myndað sér skoðun á framtíð skólahalds í sveitarfélaginu. „Það segir sig sjálft að þegar slík mistök verða þá verður niðurstaðan mjög fjarri raunveruleikanum og allur samanburður því rangur. Þarna hafa átt sér stað mistök einhversstaðar í þessu vinnuferli en þau mistök voru ekki hjá starfsfólki Borgarbyggðar. Hagstofan safnar á rafrænan hátt saman upplýsingum um fjárhag sveitarfélaga og aðra starfsemi þeirra úr ýmsum gagnagrunnum. Skólavogin fær þessar upplýsingar afhentar frá Hagstofunni en þær eru m.a. yfirfarnar af starfsfólki Sambands íslenskra sveitarfélaga. Skólavogin vinnur síðan úr fyrrgreindum upplýsingum og birtir þær í þeim tilgangi að fá fram samanburði milli skóla á ýmsan hátt. Hvert og eitt sveitarfélag kemur ekkert að þessari gagnavinnslu,“ segir Gunnlaugur að endingu og ítrekar mikilvægi þess að leiðréttar upplýsingar komist sem víðast.

Alvarleg villa í útreikningi Skólavogarinnar um meðallaun