Landsþing Sambands íslenskra sveitarfélaga fór fram í liðinni viku. Í ávarpi sem Sigurður Ingi Jóhannsson samgöngu- og sveitarstjórnarráðherra flutti varð honum tíðrætt um samgöngumál og þær stórframkvæmdir sem framundan eru í endurnýjun vegakerfisins. Ráðherra sagði stórsókn vera framundan í samgöngumálum þjóðarinnar. Í nýkynntri fjármálaáætlun hafi framlög til samgöngumannvirkja verið hækkuð verulega frá fyrri samgönguáætlun og alls muni fjárfestingar nema ríflega 120 milljörðum króna á fimm ára tímabili áætlunarinnar. Megintilgangurinn væri að fjárfesta í öryggi í samgöngum og vegakerfinu víða um land en fjárfestingin komi einnig á góðum tíma fyrir hagkerfið. „Meðal framkvæmda sem unnið verður að eru Vestfjarðavegur um Gufudalssveit, tvöföldun Reykjanesbrautar að Reykjanesbæ, breikkun Suðurlandsvegar að Selfossi og Vesturlandsvegar um Kjalarnes. Þá verður lokið við gerð Dýrafjarðagangna og Dettifossveg,“ sagði Sigurður Ingi en tók fram að fleiri verkefni væru tíunduð í nýsamþykktri samgönguáætlun.

Tillögur um fjármögnun væntanlegar

Þá sagði ráðherra að stofnaður verður vinnuhópur í samstarfi ríkisstjórnar og Samtaka sveitarfélaga á höfuðborgarsvæðinu, sem hefur það að markmiði að finna fjármögnunarleiðir fyrir stórframkvæmdir í samgöngum á höfuðborgarsvæðinu. Sagði hann að samningsdrög yrðu tilbúin fyrir sumarið um skiptingu fjármögnunar verkefnisins milli ríkis og sveitarfélaga. „Þetta verða mikil tímamót enda verður á grunni væntanlegs samkomulags hægt að hefjast handa við ríflega 100 milljarða uppbyggingu á þéttbýlasta svæði landsins,“ sagði ráðherra. Hann sagði það verða verkefni nýrrar samgönguáætlunar að taka mið af niðurstöðu starfshóps um flýtiframkvæmdir með gjaldtöku. Þar yrði einnig fjallað um möguleg samstarfsverkefni (PPP) í samgönguframkvæmdum þar sem umferð er næg til að standa undir slíku. Sagði hann að tillögur starfshóps um fjármögnun á vegakerfinu verði formlega kynntar í næstu viku [þessari, innsk. blm.].

Veggjöld ef val er um aðrar akstursleiðir

„Það eru nokkrir kostir í boði þegar kemur að því að fjármagna vegakerfið. Mitt markmið hefur ekki verið veggjöld í sjálfu sér. Ég hef sagt að æskilegt er að nýta arðgreiðslur Landsvirkjunar og bankanna. Sú leið er hagkvæmari fyrir ríkið en aðrir kostir vegna lægri fjármagnskostnaðar. Hins vegar geta samvinnuverkefni (PPP) hentað vel í stórum og vel skilgreindum nýframkvæmdum. Dæmi um slík verkefni eru Sundabraut og tvöföldun Hvalfjarðarganga. Þá væri hægt að flýta brú yfir Hornafjarðafljót og veg yfir Öxi með gjaldtöku að hluta, sé vilji til þess. Á þessum leiðum skiptir máli að hafa val um aðra leið,“ sagði Sigurður Ingi.

Ráðherra ræddi framkvæmdir í vegamálum