Einn fremsti listamaður þjóðarinnar, Páll Guðmundsson á Húsafelli, er sextíu ára í dag, 27. mars. Páll er fæddur á Húsafelli 1959 og ólst upp í faðmi fjallhringsins sem mótuðu hann strax frá barnæsku. Hann gekk í barnaskóla á Kleppjárnsreykjum, í Hagaskóla en stundaði nám í Myndlista- og handíðaskóla Íslands 1977-1981. Eftir það stundaði hann nám í Listaháskólanum í Köln í Vestur-Þýskalandi þar sem hann lagði stund á höggmyndalist. Eftir námsárin í Þýskalandi hefur Páll búið í Borgarfirði. Hann kenndi nokkra vetur myndlist við Grunnskólann í Borgarnesi en hefur síðan helgað sig mynd- og högglist af ýmsu tagi. Fer gjarnan ótroðnar slóðir eins og komið hefur fram í viðtölum og frásögnum sem birst hafa við hann í áranna rás í Skessuhorni.

Páll ver afmælisdegi sínum í Reykjavík. „Ég ætla að hafa hægt um mig í dag í faðmi nánustu fjölskyldu, sem að stórum hluta er búsett í Reykjavík. Ég hef það fínt og hlakka til að takast á við næsta áratug í lífinu,“ segir Páll í samtali við Skessuhorn.

Skessuhorn óskar Páli til hamingju með daginn. Við látum hér fylgja brot af þeim myndum sem fyrirfinnast í safni Skessuhorns af Páli, listaverkum hans og samferðarfólki.

: AppleMark

Páll á Húsafelli – sextugur í faðmi fjallahrings