Nemendafélag Fjölbrautaskóla Vesturlands á Akranesi frumsýndi söngleikinn Rock of Ages fyrir fullu húsi í Bíóhöllinni á Akranesi á föstudagskvöldið síðasta. Söngleikurinn gerist í Los Angeles þar sem klassísk rokklög frá áttunda áratugnum ráða ríkjum. Sherrie er ung stúlka sem flytir til LA með stóra drauma. Hún fær vinnu á skemmtistaðnum Bourbon room en framtíð staðarins er ekki traust. Það stendur til að loka staðnum en aðdáendur Bourbon room mótmæla og berjast fyrir að halda staðnum opnum.

Stuðið réði ríkjum á sviðinu, og í salnum öllum, og tekst leikurum einstaklega vel að halda athygli áhorfenda. Þrátt fyrir heldur dramatískan söguþráð var mikill húmor í sýningunni og mikið var hlegið í salnum. Tónlistina ættu flestir að þekkja en hún samanstendur af stórsmellum áttunda áratugarins, lög frá Bon Jovi, Twisted Sister, Poison, Styx og fleiri rokkhljómsveitum. Krakkarnir fluttu lögin öll mjög vel og af miklu öryggi. Söngurinn heyrðist vel og ekki var annað að sjá en öllum hafi liðið vel á sviðinu. Þá var hljómsveitin á sviðinu allan tímann og spilaði stórt hlutverk í sýningunni. Nemendafélagið vann sýninguna í samstarfi við Tónlistarskóla Akraness og skilaði samstarfið sér vel í vel framsettri tónlist. Leikurinn var ekki síðri en tónlistin en allir stóðu sig með stakri prýði, það heyrðist vel í öllum og ekki að finna annað en allir væru með sínar línur alveg á hreinu.

Mjög gott flæði var á sýningunni og til að poppa upp stemninguna og eyða út öllum dauðum stundum var sögumaður sem hélt áhorfendum vel upplýstum um hvað var að gerast hverju sinni. Það kom vel út og braut upp sýninguna og dramatískan söguþráð með húmor sem passaði mjög vel inn í. Sviðsmyndin var góð og gerði mikið fyrir sýninguna og upplifunin var dálítið eins og maður væri kominn inn á gamlan rokkklúbb í bíómynd. Notast var við skjávarpa til að gefa betri mynd af því hvar sýningin gerist og kom það mjög vel út. Viðtökur gesta á frumsýningunni bentu til þess að allir væru hæstánægðir og fengu krakkarnir standandi lófatak í lok sýningar. Þetta var vel heppnuð og flott sýning sem vert er að sjá.

-Anna Rósa Guðmundsdóttir.

Mikið stuð í salnum á frumsýningu Rock of Ages