Opnunartími Guðlaugar lengdur

Bæjarráð Akraness samþykkti á síðasta fundi sínum að lengja opnunartíma Guðlaugar, heitrar laugar við Langasand. Lengdur opnunartími tók gildi þegar í stað. Guðlaug er nú öllum opin án endurgjalds miðvikudaga til föstudaga frá kl. 16:00 til 20:00, milli kl. 10:00 og 16:00 á laugardögum og frá 12:00 til 18:00 á sunnudögum. Þannig verður það á tímabilinu 1. september til 30. apríl. Sumaropnun frá 1. maí til 31. ágúst verður frá kl. 12:00 til 20:00 alla daga nema miðvikudaga og laugardaga, en þá verður opið frá 10:00 til 18.

Lengdur opnunartími Guðlaugar kemur til með að kosta 6,8 milljónir króna, að því er fram kemur í fundargerð bæjarráðs. Viðbótarkostnaðinum verður mætt með lækkun á áætluðum rekstrarafgangi bæjarsjóð, sem er áætlað að verði um 416 milljónir króna samkvæmt fjárhagsáætlun.

„Eftirspurn eftir auknum opnunartíma hefur verið mikil og bindur bæjarráð vonir við að íbúar og aðrir gestir laugarinnar verði ánægðir með þessar breytingar. Guðlaug hefur frá opnun verið mjög vel sótt, gestir laugarinnar hafa verið alls um 3000 og virðast flestir gestanna vera hæstánægðir með mannvirkið og kosti þess,“ segir í frétt á vef bæjarins. „Akraneskaupstaður hefur unnið markvisst að því að bæta aðstöðuna við og frá lauginni niður á Langasand og með vorinu kemur nýtt þjónustuhús með salernum, stóru steinarnir í fjörunni verða fjarlægðir o.fl.“

Líkar þetta

Fleiri fréttir