Að undanförnu hafa staðið yfir stífar æfingar hjá leiklistarklúbbi Nemendafélags Fjölbrautaskóla Vesturlands á Akranesi á söngleiknum Rock of Ages. Frumsýnt verður næstkomandi föstudag. Að sögn formanna leiklistarklúbbsins, þeirra Thelmu Rakelar Ottesen, Hrannar Eyjólfsdóttur og Freyju Maríu Sigurjónsdóttur, koma um 80 manns að sýningunni með einhverjum hætti, en á svið stíga um 25 efnilegir leikarar sem hafa að sögn formannanna staðið sig mjög vel í gegnum allt ferlið.

„Rock of Ages er söngleikur byggður í kringum rokktónlist sem var vinsæl á 9. áratugnum. Söngleikurinn fjallar um unga stúlku sem kemur til Los Angeles í þeirri von um að verða leikkona og þar kynnist hún Drew Boley sem á sér draum um að verða rokkstjarna. Skemmtistaðurinn The Bourbon Room á stóran hluta í þeirra lífi þar sem þau kynnast eigendunum Lonny og Dennis. Á meðan þetta á sér stað eru þýskir bræður í viðskiptahugleiðingum og ætla þeir sér að betrumbæta borgina og taka niður allt Sunset Strip, þar á meðal Bourbon Room. Í gegnum söguna kynnumst við meðal annars byltingakenndu Reginu sem hefur uppi mótmæli gagnvart bræðrunum, Justice Charlier sem hjálpar Sherrie að finna sína leið og rokkstjörnunni Stacee Jaxx sem breytir fantasíu draumum stúlkna í veruleika. Þetta er sönleikur stútfullur af húmor, ást og skemmtilegum uppákomum,“ útskýra þær Thelma, Hrönn og Freyja spurðar um hvað leikritið fjallar.

Leikstjórn er í höndum Gunnars Björns Guðmundssonar, en hann leikstýrði einnig leikritinu Með allt á hreinu fyrir leiklistarklúbb NFFA á síðasta ári og sló sú sýning rækilega í gegn. Stefnt er á að vera með átta sýningar en eins og fyrr segir er frumsýning á föstudaginn næstkomandi, 22. mars. „Við höfum verið að æfa stíft síðustu vikurnar, enda er þetta mjög stór sýning og ganga æfingarnar ótrúlega vel. Krakkarnir hafa lagt sig alla fram og við erum mjög spennt að sýna gestum lokaútkomuna,“ segja þær stöllur.

Söngleikurinn Rock of Ages færður á fjalirnar