Sjúkratryggingar Íslands hafa að ósk heilbrigðisráðuneytisins fengið opnun útboðs vegna kaupa á sjúkrabílum frestað fram í ágúst næstkomandi. Ástæðan er að samningaviðræðum milli ráðuneytisins og Rauða kross Íslands þarf að ljúka. Forsenda þess að hægt sé að fara í útboð er að samkomulag náist milli þessara aðila, að því er fram kemur í tilkynningu frá ráðuneytinu. „Heilbrigðisráðuneytið og Rauði kross Íslands hafa um alllangt skeið unnið að samkomulagi varðandi samning sem í gildi hefur verið um útvegun og rekstur sjúkrabíla á hendi Rauða krossins. Aðilar eru sammála um að meginmarkmiðið verði að vera að tryggja landsmönnum áfram örugga sjúkraflutninga og sjá til þess að unnt verði að ráðast sem fyrst í nauðsynlega endurnýjun sjúkrabíla,“ segir í tilkynningunni. Þar segir enn fremur að nauðsynlegt sé að skoða allar leiðir um hvernig leysa megi málið til lengri og skemmri tíma. „Þannig að rekstur og endurnýjun sjúkrabílaflotans geti komist í eðlilegt horf hið allra fyrsta.“

Engir nýir sjúkrabílar hafa verið teknir í notkun á landinu síðan í ársbyrjun 2016. Til stóð að opna tilboð vegna kaupa á 25 nýjum sjúkrabílum 14. mars, eftir ítrekaðar frestanir.

Þolir enga bið

Engir sjúkrabílar í umdæmi Heilbrigðisstofnunar Vesturlands hafa verið endurnýjaðir undanfarin ár. Þegar Skessuhorn fjallaði um málið í febrúar á síðasta ári upplýsti Gísli Björnsson, yfirmaður sjúkraflutninga hjá HVE, að 10 af 16 sjúkrabílum í umdæminu væru meira en tíu ára gamlir. Þar af voru tveir bílar eldri en 20 ára og sá elsti 25 ára gamall. Meðalaldur bílanna var 12 ár. Þá hafði einmitt komið upp sú staða tvisvar í sömu vikunni að sjúkrabíll bilaði á meðan ekið var með sjúkling í forgangsakstri. Gísli sagði ástandið algerlega óviðunandi. „Í kröfulýsingu velferðarráðuneytisins fyrir sjúkraflutninga var miðað við að sjúkrabílar skyldu ekki verða eldri en fimm ára gamlir. Meðalaldur bílanna okkar er tæp tólf ár,“ sagði hann í samtali við Skessuhorn í febrúar á síðasta ári. Síðan þá er staðan óbreytt en bílarnir auðvitað eldri. „Endurnýjun sjúkrabílaflotans þolir enga bið,“ sagði Gísli fyrir rúmu ári síðan.

Sjúkrabílaútboði enn á ný frestað